Qyzylordada dinı ekstremızmmen kúres sharalaryna bólingen qarjy qoldy boldy

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi bıýdjet qarjysyn jymqyrǵan taǵy bir qyzmetkerdi ustady, dep xabarlaıdy QazAqparat tilshisi.

Qoǵammen baılanys departamentiniń dırektory Arman Berdalınniń aıtýynsha, Qyzylorda oblysy ishki saıasat basqarmasy basshysynyń burynǵy orynbasaryna qatysty sotqa deıingi tergeý bastaldy.

«Ol dinı ekstremızm jáne terrorızmge qarsy is-qımyl jónindegi memlekettik baǵdarlamanyń sheńberinde azamattardy dinı aǵartý boıynsha is júzinde jasalmaǵan jumystar úshin 2,1 mıllıon teńgeni qoǵamdyq qorǵa aýdarǵan. Sóıtip, laýazymyn teris paıdalanǵany úshin kúdikke ilinip otyr. Tergeý jalǵasýda», - dedi A.Berdalın.

Aıta keteıik, búgin agenttik Mańǵystaý oblysynyń deneshynyqtyrý jáne sport basqarmasy basshysynyń qamaýǵa alynǵanyn jarııalady. Ol memleket múddesine 1 mıllıard teńgeden astam somaǵa zalal keltirgen. Budan bólek, aǵaıyndy Rysqalıevterdiń sybaılasy qamaýǵa alyndy.