Qyzylordada dıqan qarbyzdyń erekshe túrinen mol ónim aldy
QYZYLORDA. QazAqparat - Qyzylorda oblysy Jańaqorǵan aýdanyna qarasty Jaıylma eldi mekeninde «Jıdeli» sharýa qojalyǵynyń dıqany Abaı Kórpebaev bıyl qarbyzdyń erekshe túrin egip, mol ónim aldy. Gollandııalyq «Farao F1» sortynyń árbiri 20-25 kelige deıin tartady, dep habarlaıdy QazAqparat tilshisi.
Qarbyzdyń atalmysh surypy bıyl 1 gektarǵa ǵana egildi. Alǵashqy jyly-aq, suryptyń bul túri tıimdiligin kórsetti. Búginde Jaıylma dıqandary ózderi jınaǵan qaýyn-qarbyzyn eksportqa shyǵarýǵa múmkindik aldy. Ózge eldegi tutynýshylar da qarbyzdyń jańa surypyna úlken suranys tanytyp otyr. Qazir atalmysh surypty eldegiler qozy qarbyz dep atap ketken kórinedi. Syrttaı qaraǵanda qarbyz jerde jatqan qozyǵa uqsap ketedi.
«Men uzaq jyldan beri dıqandyqty kásip etip kelemin. Qazir jerden nesibe tergenimizge jıyrma jylǵa jýyqtady. Jylda kóktemde baqsha ónimderiniń tuqymyn satyp alamyz. Bıyl «Farao F» degen qarbyz sortyna kózimiz tústi. Gollandııalyq sorttyń ónimdiligi joǵary eken. Degenmen baǵasy qymbat. Kádimgi sorttan baǵasy 10 esedeı artyq. Táýekel ettim. Jańa sortty tájirıbeden ótkizýge nıet jasadym», - deıdi Abaı Kórpebaev.
Dıqan tájirıbe barysynda atalmysh sorttyń kóp ereksheligin baıqady. Jerdiń qunaryna baılanysty ónim deńgeıi arta túsedi eken. Atap aıtqanda, gektaryna 100 tonnaǵa deıin ónim jınaýǵa bolady. Bul - qarapaıym eńbek adamy úshin mol tabystyń kózi. Sondaı-aq, onyń árbiriniń salmaǵy ortasha eseppen 17 kılogrammǵa deıin jetedi. Salmaqty degenderi 35 kılogrammǵa deıin jetedi. Elıtalyq tuqym retinde baǵalanady. Dıqan A.Kórpebaev osylaısha jańa suryp jaıynda jan-jaqty aıtyp berdi. Bolashaqta atalmysh qarbyz túriniń kólemin arttyrýǵa nıet tanytyp otyr.
Qarbyzdyń bul túri úsh aıǵa jýyq ýaqytta pisip-jetiledi. Ónimdiligi óte joǵary bolyp, sharýa adamyna mol kiris kirgizdi. Ortasha eseppen alǵanda ár gektarynan 80-85 tonna ónim jınaýǵa bolady. Árıne, kóktem aılarynda ony ekken tusta árbir gektarǵa 100 myń teńgeden shyǵyndaýǵa týra keledi. Esesine odan mol ónim jınalyp, ózin tolyqtaı aqtaıdy.
