Qyzylordada dıhandarǵa tegin keńes berý qyzmeti iske qosylady
QAZALY. QazAqparat - Qyzylorda oblysy Syrdarııa aýdanynda dıhandarǵa arnalǵan tegin keńes berý qyzmeti iske qosylady, dep habarlaıdy QazAqparat tilshisi.
Aıta keterligi, Qyzylordada kúrish ósirýmen aınalysatyn sharýashylyqtar úshin «Tyńaıtqyshtardy tıimdi paıdalaný jáne kúrish ónimdiligin arttyrý» taqyrybynda semınar ótken bolatyn. Oblystaǵy kásipkerler palatasynyń bólim basshysy Jasulan Serikovtiń aıtýynsha, bul semınarda sharýalar úshin ýaqyt kúttirmeıtin sheshim qabyldanyp otyr.
«Kúrish alqaptarynan joǵary ónim alý úshin «tegin keńes berý qyzmetin» bastamaqshymyz. Osyǵan baılanysty Syrdarııa aýdanynda zeınetke shyqqan tájirıbeli agronomdy jumysqa alý josparlanýda. Nátıjesinde kez kelgen kúrishshi aptasyna eki kún keńsege baryp keńes alýǵa jáne mamandy egis alqabyna shaqyrtyp qajetti paıdaly nusqama-keńesterin alý múmkindikterine ıe bolmaq», - dedi bólim basshysy.
Onyń sózine qaraǵanda, atalǵan mańyzdy bastamaǵa «Abaı Dáýlet» JShS-i qoldaý kórsetýge daıyn ekenin aıtqan.
«Mundaı «keńes berý qyzmetteri» Eýropa elderinde jaqsy jolǵa qoıylǵan. Sharýashylyqtar kóp ornalasqan óńirlerde ashylyp, zeınet jasyndaǵy tájirıbesi mol aýylsharýashylyq mamandardy jumysqa alynyp, jas sharýashylyqtarǵa qoldaý jasaıdy. Qazirgi tańda agronom-mamannyń turaqty otyratyn ornyn uıymdastyrý sharalaryn júrgizýdemiz», - dedi J.Serikov.
