Qyzylordada dıabetıkterge ǵana beriletin preparatty dáriger ózi ıemdenip ketken
QYZYLORDA. QazAqparat - Qyzylorda oblysy Aral aýdanynda qant dıabeti aýrýyna baılanysty retsepti boıynsha tegin beriletin «Vıktoza» dárisiniń 35 qorabyn osy dıagnozben naýqas aýdandyq ambýlatorııalyq emhananyń dárigeri ózi negizsiz alǵan, dep habarlaıdy QazAqparat tilshisi.
«Vıktoza»dárisi qymbat turady. Onyń bir qorabynyń baǵasy 45 myń teńge shamasynda. Bul dáriniń 35 qorabyn aýdandyq ambýlatorııalyq emhananyń dárigeri negizsiz alǵan. Nátıjesinde 5 adam qajetti dárige qol jetkize almaǵan. Alaıda, bir naýqas úshin jylyna «Vıktoza» preparatynyń 18 qorabyn ǵana qoldanýǵa ruqsat berilgen.
«Atalǵan derek aýdandyq polıtsııa bólimine tergep-tekserý úshin júktelip, osyǵan jol bergen kináli medıtsına qyzmetkerleri tártiptik jaýapkershilikke tartyldy. Osyǵan oraı, prokýratýranyń yqpalymen emhananyń dárigerine berilgen 10 qorap dári keri qaıtaryldy. Ol dáriler qant dıabeti bar 5 naýqasqa tolyq taratylyp berildi», - dedi Qyzylorda oblystyq prokýratýrasynyń baspasóz hatshysy Ǵabıt Uzaqbaı.
