Qyzylordada dıabet ortalyǵy ashyldy
QYZYLORDA. QazAqparat - Qyzylorda qalasyndaǵy oblystyq medıtsına ortalyǵynda dıabet ortalyǵy ashyldy, dep habarlaıdy QazAqparat.
Munda sýsamyr dertine shaldyqqan qyzylordalyqtarǵa keshendi em jasalady. Ortalyqtyń ashylý saltanatyna oblysy ákiminiń orynbasary Rýslan Rústemov, oblystyq densaýlyq saqtaý basqarmasy basshysynyń orynbasary N.Myrzaǵalıeva, Asfendııarov atyndaǵy QazUMÝ-dyń endokrınologııa kafedrasynyń meńgerýshisi J. Abylaıuly, QR dıabetologtar assotsıatsııasynyń Qyzylorda oblystyq fılıalynyń tóraıymy S.Tleýlesova qatysty. Shara ǵylymı-tájirıbelik konferentsııaǵa ulasty.
Halyqaralyq dıabet federatsııasynyń málimeti boıynsha, álemde 420 mıllıonnan astam adam osy dertke shaldyqqan. Onyń teń jartysy 20-60 jas aralyǵyndaǵy azamattar, Jer betinde ár sekýnd saıyn bir adam dıabetke shaldyqsa, 7 sekýnd saıyn bir adam osy aýrýdan kóz jumady.
Resmı emes derekke sáıkes, elimizde bul keselge dýshar bolǵandar sany 600 myńnan asady.
