Qyzylordada demalys bólmesin jasap alǵan mektep dırektorlary bar
QYZYLORDA. QazAqparat - Qyzylorda oblysynda ruqsat etilgen aýmaqtan artyq kólemde kabınet jasaqtap alǵan 52 mektep dırektory endigi kezekte bilim ordasynyń shaǵyn bólmelerin paıdalanatyn boldy. Olardyń arasynda demalys bólmelerin jasap alǵany da kezdesti, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti «Adaldyq alańy» jobasy aıasynda Syr óńirindegi 335 bilim berý uıymdarynda arnaıy tekserý sharalaryn júrgizdi.
Mektep dırektorlary ózderiniń kabınetterin ІT tehnologııa, ulttyq biryńǵaı testileýge daıyndaý kýrstary, ózge de úıirmelerge bosatyp berdi. Nátıjesinde olardyń paıdalanýynda bolǵan artyq alańdar joıyldy.
«Keıbir mektep dırektory kabınetterin ekinshi qabatqa ornalastyrǵan. Aldaǵy ýaqytta olardyń barlyǵy tómenge túsiriledi. Bul sharalar aldaǵy jazǵy demalys ýaqytynda júzege asady dep josparlanyp otyr. Qazirgi kúnderi 30-ǵa jýyq mektep dırektory ekinshi-úshinshi qabattaǵy kabınetin birinshi qabattaǵy bólmelerge aýystyryp úlgerdi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti basshysynyń orynbasary Berikbol Baıqojaev.
Atalmysh is-shara oblystyń barlyq aýdany men Qyzylorda qalasynda ótkizilgen. Bul jumys óz jemisin berip otyr.
