Qyzylordada dástúrli malshylar sleti ótkiziledi
Atalmysh shara jyldaǵydaı Jańaqorǵan aýdany aýmaǵyndaǵy Qarataýdyń baýraıynda bolady.
«Tuńǵysh Prezıdent - Elbasy Nursultan Nazarbaev 2018 jylǵy 5 qazandaǵy Qazaqstan halqyna joldaýynda agroónerkásip kesheniniń áleýetin tolyq iske asyrý qajettigin atap ótken bolatyn. Malshylar sletiniń negizgi maqsaty - tórt túlikti túletip júrgen sharýa ıeleriniń jańa zaman talaptaryna beıimdele otyryp, osy kásipti keńeıtip, ony odan ári damytýdyń joldary týraly pikir almasý. Jyl boıyna jazdyń ystyǵyna, qystyń sýyǵyna qaramastan tórt túlik maldy ósirýmen aınalysyp júrgen sharýalardyń eńbegi orasan zor»,- deıdi Qyzylorda oblystyq aýyl sharýashylyq basqarmasy basshysynyń orynbasary Seıilbek Nurymbetov.
Oblystyq malshylar sletine QR Aýyl sharýashylyǵy mınıstrliginiń, Aýyl sharýashylyǵy qyzmetkerleriniń salalyq kásiptik odaǵynyń, «QazAgro» Ulttyq Basqarýshy holdınginiń ókilderi, respýblıkamyzdyń belgili ǵalymdary, tórt túlik maldyń respýblıkalyq palatalary, jabdyqtaýshy kásiporyndar qatysyp keledi.
Qyzylorda oblysynda ótkizilip júrgen malshylar sletiniń jyldan jylǵa mańyzdylyǵy artyp, qatysýshylardyń qatary kóbeıýde. Byltyrǵy jyly malshylar sletine Qyzylorda oblysyn qosqanda 7 óńir ókilderi, naqty aıtkanda Atyraý, Aqtóbe, Batys Qazaqstan, Jambyl, Qaraǵandy, Túrkistan oblystarynyń delegatsııalary qatysyp pikir almasty.
Bıyl aımaqtaǵy dástúrge aınalǵan oblystyq malshylar sletine respýblıkanyń barlyq oblystarynyń delegattary shaqyryldy. Alqaly jıynda «Mal sharýashylyǵyn damytýdyń ózekti máseleleri týraly» ǵylymı konferentsııa jáne mal sharýashylyǵy salasy boıynsha kórme uıymdastyrý josparlanyp otyr.
