Qyzylordada dástúrli aqyndar mektebi ashylady
Aqyndar mektebi óner ıesiniń ózi ómir súretin Syrdarııa aýdanynda tusaýyn kesedi, dep habarlaıdy QazAqparat tilshisi.
Atalmysh ıgi shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda júzege asady.
Bul jaǵymdy jańalyqty Syrdarııa aýdanynyń ákimi Rýslan Rústemov jarııa etti.
Aýdan ákimi áleýmettik jelidegi jazbasynda «Qazaq rýhanııatynda ózindik orny bar Zametdın Ibadýllaevty aqtańger aıtys aqyny dep qurmet tutamyz. Sóz óneriniń qudireti men aqyn qııalynyń ushqyrlyǵyn joǵary baǵalaı alamyz. Jaqynda aýdan ákimdiginde apparattyq májilis ótkizilip, aýdannyń mádenıet salasynda atqarylǵan jáne júzege asyrylatyn jumystar keńinen talqylandy. Tıisti sala basshylaryna «Zametdın Ibadýllaev atyndaǵy dástúrli aqyndar mektebin» ashý jóninde usynys engizýge tapsyrma berdim. Jýyrda aýdandyq máslıhatynyń sheshimimen Zametdın Ibadýllaevqa «Syrdarııa aýdanynyń Qurmetti azamaty» ataǵy berildi», - dep jazdy Rýslan Rústemov.
Zametdın Ibadýllaev 1939 jyly Qyzylorda oblysy Syrdarııa aýdany Aqjarma aýylynda dúnıege kelgen. Óner ıesi týǵan topyraqtan jyraqqa ketpeı-aq úlken tabystarǵa qol jetkizdi. Ótken ǵasyrdyń jetpisinshi-sekseninshi jyldary aıtysta óz órnegin tanyta bildi. Sonyń ishinde aıtystyń ótirik óleń túrinen jurtshylyqqa keńinen tanymal boldy. Sondaı-aq, Z.Ibadýllaev qazaq halqynyń kóptegen qıssa-dastandaryn jas urpaqqa jetkizýde ólsheýsiz eńbek sińirdi. Qazirgi tańda ol kisiniń repertýarynda «Kóruǵly», «Áziretáli men Darıǵa qyzdyń kúresi», «Júsip-Zylıha», «Aısha bıbi týraly ańyz», «Haziretáli Ǵalı jaıly hıkaıa» sekildi týyndylar bar.
Budan buryn Iranda «Qorqyt ata» kitabynyń jańa nusqasy tabylǵanyn habarlaǵan edik.