Qyzylordada dárigerler kókparda attyń astynda qalyp qoıǵan jigittiń ómirin saqtap qaldy
Oqıǵa Shıeli aýdany aýdanynda boldy. Aýdanǵa qarasty Balabı aýylynyń turatyn 25 jastaǵy Manar Mahanov kókpar kezinde astyndaǵy atymen birge qulap qaldy. Jylqy shabandozdy qysyp, onyń ishki múshelerin zaqymdalǵan. Ol dereý Shıeli aýdandyq aýrýhanasyna jetkizilgen. Dárigerler shuǵyl ota jasaýynyń nátıjesinde qazir naýqastyń jaǵadaıy turaqty.
«Jylqy ústime bar salmaǵymen qulady. Sonyń saldarynan ishek, asqazan, uıqy bezimde jaraqat aldym. Ota barysynda jyrtylǵan jerler tigilip, ishki múshelerimde qan ketý toqtady. Men 5 kún boıy jansaqtaý bóliminde jattym. Dárigerlerge ýaqytyly, kásibı medıtsınalyq kómek kórsetkeni úshin alǵysym sheksiz», - deıdi Manar.
Aýdandyq aýrýhananyń hırýrg dárigeri Azamat Maqulbekovtyń aıtýynsha, naýqas MÁMS júıesinde saqtandyrylǵan sondyqtan densaýlyq jaǵdaıy jaqsarǵannan keıin medıtsınalyq ońaltýǵa jiberiledi. Dáriger kóp jaǵdaıda jedel holetsıstıtpen, soqyrshekpen sondaı-aq ártúrli jaraqattarmen shuǵyl naýqastar túsetinin atap ótti.
«Pyshaq jaraqattary bar naýqastardyń ómirin birneshe ret qutqardyq. Olardyń biriniń baýyry, asqazany, búıregi, ishegi zaqymdalǵan, al basqa aýdan turǵynynyń júreginde pyshaq jaraqaty bolǵan. Ekeýi de qutqaryldy. Balalar men eresekterden túıreýishter, batareıalar, tis tazartqyshtar, balyq súıekteri jáne t.b. sııaqty bógde zattardy alý boıynsha kóptegen ota jasaldy. 2015 jyldan bastap aýrýhanada az ınvazıvti hırýrgııalyq medkómekter júzege asyryla bastady», - dedi Azamat Maqulbekov.
Jyl basynan aýdandyq aýrýhananyń hırýrgııa bóliminde mindetti áleýmettik medıtsınalyq saqtandyrý sheńberinde 886 naýqasqa, al tegin medıtsınalyq kómektiń kepildik berilgen kólemi boıynsha – 131 naýqasqa medıtsınalyq kómekter kórsetildi.
Eske salsaq, budan buryn Qyzylordada bir jasar sábıge jasalǵan kúrdeli ota sátti aıaqtaldy.
