Qyzylordada dáriger jetispeýshiligi tómendep keledi
QYZYLORDA. QazAqparat - Qyzylorda oblysynda dáriger jetispeýshiligi tómendep keledi, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Jyl saıyn aımaqqa qajetti dáriger mamandardy daıarlaýǵa oblys ákiminiń granttary bólinip otyr.
«Oblys ákiminiń granty negizinde 42 rezıdent elimizdiń 5 joǵary oqý oryndarynda daıarlanýda. 2019 jyly - 16 dáriger, 2020 jyly - 15 dáriger, 2021 jyly - 10 dáriger, 2022 jyly - 1 dáriger rezıdentýrany bitirip, óńirimizge keledi dep kútilýde. Jáne 2018 jyly jergilikti bıýdjetten 30 jalpy tájirıbelik dárigerlerdi daıarlaýǵa oblys ákiminiń arnaıy granty bólindi», - dedi oblystyq densaýlyq saqtaý basqarmasynyń basshysy Aqmaral Álnazarova.
Sondaı-aq, ótken jyly 1500-ge jýyq medıtsına salasynyń qyzmetkeri shetelde bilimin jetildirdi.
«2018 jyly jergilikti bıýdjetten bólingen qarjyǵa 767 maman bilimin jetildirse, 720 dáriger biliktilikterin arttyrdy. Onyń ishinde 7 maman Koreıa memleketinde, 157 maman Tatarstan Respýblıkasynyń astanasy - Qazan qalasynda oqydy», - dedi basqarma basshysy.
