Qyzylordada dári-dármek qoryn tolyqtyrý úshin 56 mln teńge bólindi
QYZYLORDA. QazAqparat - Qyzylordada dári-dármek qory jetkilikti. Bul maqsatta taǵy da 56 mln teńgege qosymsha dári-dármek jetkiziledi, dep habarlaıdy QazAqparat tilshisi.
Pandemııa kezeńinde oblysta 5 mıllıon qaptama kóleminde medıtsınalyq preparattar satyp alyndy. Olardyń qatarynda qyzýdy túsiretin, antıbıotık, vırýsqa qarsy, ımmýnostımýlıator, medıtsınalyq buıym, ınektsııalyq preparattar bar. Aldaǵy ýaqytta 56 mıllıon teńgege taǵy da dári-dármek alynady.
Oblystyq medıtsınalyq jáne farmatsevtıkalyq baqylaý departamenti óńirlerdegi kóterme dıstrıbıýtorlar men dárihanalarda suranysqa ıe dári-dármekter men medıtsına buıymdarynyń tolyq qamtylýyna turaqty monıtorıng júrgizýde. Bıylǵy jyldyń 15 shildesi men 9 jeltoqsany aralyǵynda kóterme saýda qoımalary men dárihanalarda dári-dárıekter qory kóbeıdi. Atap aıtqanda, antıbıotıkter - 2,2, vırýsqa qarsy preparattar - 2,3, antıkoagýlıanttar - 2,4, ystyqty túsiretin preparattar - 3,7, medıtsınalyq maskalar - 1,5 esege artty.
«Monıtorıng nátıjesinde 159 astam dárihana qamtylyp, shekti baǵadan qymbat satylǵan dári-dármekterdiń 72 ataýy anyqtaldy. Kórsetilgen kezeńde olarǵa 5,2 mln. teńge aıyppul salyndy. Shekti baǵadan asyp ketýdiń 33, dári-dármekterdi zańsyz ótkizýdiń 17 deregi anyqtaldy. Ákimshilik quqyqbuzýshylyq týraly 91 hattama toltyrylyp, 7,9 mln. teńge aıyppul salyndy. Zańsyz aınalymnan 448 ataýdaǵy dári men 36 ataýdaǵy medıtsına buıymy alyndy», - dedi oblystyq medıtsınalyq jáne farmatsevtıkalyq baqylaý departamentiniń bólim basshysy Nurbek Ádilhanov.
Óńirde 10 farmatsevtıkalyq uıym nesıe aldy. Olardyń 5-ýi aýdanda bolsa, 5-ýi qalada ornalasqan. Sonymen qatar, oǵan 13 farmatsevtıkalyq uıym qujatyn jınaqtaýda.
Esterińizge sala ketelik, 11 jeltoqsannan bastap Qyzylorda oblysynda karantın talaptary jeńildetiledi.
