Qyzylordada «Damý» qory arqyly kásipkerlerge 8 myńnan asa tegin qyzmet kórsetildi
QYZYLORDA. QazAqparat - «Damý» qorynyń Qyzylorda oblysyndaǵy Kásipkerlerge qyzmet kórsetý ortalyǵy (KQKO) birneshe jyl qatarynan bıznesti júrgizý boıynsha tegin keńestik qyzmet kórsetip keledi. Ortalyq jumysynyń nátıjeliligi kásipkerler arasynda suranystyń joǵary bolýyna tikeleı baılanysty bolyp otyr. Atap aıtqanda, 2016 jyl ishinde KQKO keńesshileri kásipkerlerge 8183 qyzmet kórsetti, dep habarlady QazAqparat HAA tilshisi qorǵa silteme jasap.
Bıznes ókilderi kásipkerlikti memlekettik qoldaý baǵdarlamalary men marketıng jáne zań suraqtary, býhgalterlik jáne salyq esebi boıynsha bilikti kómekke «bir tereze» rejıminde qol jetkizýde. Granttyq qarjylandyrýdyń memlekettik baǵdarlamalaryna qatysýǵa, ekinshi deńgeıli bankterden jáne BUU Damý baǵdarlamasy aıasynda nesıe alý úshin, sondaı-aq «Jumyspen qamtý-2020» baǵdarlamasymen jeńildetilgen nesıe qarjatyn tartýǵa kásipkerlerge tegin túrde 83 bıznes-jospar jasalyp, qarjylandyrýǵa deıin súıemeldendi.
Kásipkerlerge qyzmet kórsetý ortalyǵynda keńestik-aqparattyq qoldaýmen qatar, turaqty túrde tegin oqytý semınarlaryn uıymdastyrý jolǵa qoıylǵan. Ótken jyly KQKO bazasynda túrli taqyryptar boıynsha100-ge tarta tegin semınarlar ótti. Tájirıbeli bıznes-trenerlerdi shaqyrtý arqyly ótkizilgen trenıng-semınarlarda qatysýshylar bıznes salasyndaǵy mańyzdy aqparat alyp, praktıkalyq tapsyrmalardyń sheshimin tabýǵa da mashyqtandy. Oqytý semınarlary arnaıy stýdenttik jastarǵa, múmkindigi shekteýli azamattar men názik jandy arýlarǵa baǵyttalyp uıymdastyrǵan jáne onda qatysýshylar start-ap jobalar qurýǵa qajetti bilim aldy.
Kásipker Jumataı Qalımanyń sózinshe, onyń bıznesi «Damý» Qorynyń KQKO júgingen sátten bastaý alǵan.
«53 jasymda bıznes bastap, ulttyq taǵam túrlerin shyǵarýdy qolǵa aldym. Munyń barlyǵy «Damý» Qorynyń KQKO kelip, kásipkerlikti qoldaýǵa baǵyttalǵan memlekettik baǵdarlamanyń múmkindikteri jaıynda keńes alýdan bastaldy. Keńesshilermen óz ıdeıammen bóliskennen keıin, olar maǵan «JK» retinde tirkelýge kómektesti jáne bıznes-jospar jazyp, óz bıznes-ıdeıamdy júzege asyrýǵa qaıtarymsyz grant utyp alǵan granttyq qarjylandyrý baǵdarlamasyna qatysý úshin qujattar paketin jınaýǵa járdemdesti. KQKO zańgeri jáne býhgalteri maǵan bıznesimdi júrgizýge kómek berýde jáne osynyń barlyǵy tegin túrde», - deıdi Jumataı Qalıma.
«Damý» Qorynyń keńesshileri bank pen kásipker arasyndaǵy jalǵastyrýshy býyn bolyp otyr. Bıznes ókilderine keńes túrinde ǵana emes, sonymen qatar qarjylandyrýǵa deıingi súıemeldeý qyzmetin de kórsetýde.
