Qyzylordada bıýdjetten 16,8 mln teńge jymqyrǵandar sottaldy

NUR-SULTAN. QazAqparat – «Qazaly aýdandyq qurylys, sáýlet jáne qala qurylysy bólimi» QMM basshysy men «Agrospetsmontaj» óndiristik kooperatıvi dırektorynyń orynbasary qyzmettik ókiletin asyra paıdalanǵany jáne asa iri kólemde bıýdjet qarjysyn jymqyrǵany úshin sottaldy, dep habarlaıdy QazAqparat.

Qazaqstan Respýblıkasy Sybaılas jemqorlyqqa qarsy is-qımyl agenttigi Qyzylorda oblystyq departamenti «Qazaly aýdandyq qurylys, sáýlet jáne qala qurylysy bólimi» QMM basshysy B.Tıyshtyqov pen «Agrospetsmontaj» ÓK dırektorynyń orynbasary N.Ábýovke qatysty sotqa deıingi tergeý isin aıaqtady.

B.Tıyshtyqov qyzmettik ókiletin asyra paıdalana otyryp, Qazaly qalasynda qurylys júrgiziletin turǵyn úı ınfraqurylymdaryn qamtamasyz etý nysanynyń qurylysy kezinde jalǵan oryndalǵan jumystar aktisine qol qoıǵan. Osynyń nátıjesinde Ábýov 16,8 mln teńge somasynda bıýdjet qarajatyn ıemdengen.

29 shildede Qazaly aýdandyq sotynyń úkimimen Tıyshtyqovtyń - 1 jylǵa, Ábýovtiń - 6 jylǵa bas bostandyǵy shekteldi.

Sottalýshylar memlekettik qyzmette jumys isteý quqyǵynan ómir boıyna aıyryldy.