Qyzylordada bıýdjet qarjysyna qoǵamdyq baqylaý qoıyldy

KYZYLORDA. QazAqparat - Qyzylordada engizilgen «Qoǵamdyq baqylaý kartasy» aýyldyq eldi mekenderde qurylǵan bıýdjet qarjysynyń maqsatty jumsalýyn baqylaıdy. Bul jóninde QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basshysy Abzal Muhımov málimdedi, dep habarlaıdy QazAqparat tilshisi.

Atalmysh joba arqyly jol salý, áleýmettik nysandar, kógaldandyrý jáne ózge de jumystardyń sapaly oryndalýy nazarda bolady.

«Baqylaý úsh túrli tásilmen júrgiziledi. Alǵashqy tásil - áleýmettik jeliler men telefon baılanysyn paıdalaný. Bul qoǵamdyq baqylaý kartasyn qalyptastyrýdyń qarapaıym jáne kúrdeli emes tásilderiniń biri. Qazirgi tańda halyq kóp tutynatyn vatsap jáne telegramm messendjerlerin paıdalanýdy kózdep otyrmyz. Ekinshisi «Qamqor» qosymshasy arqyly júrgiziledi. Úshinshi tásil - aýdandarda qurylǵan arnaıy monıtorıngtik toptar arqyly júrgizý», - dedi A.Muhımov.

Arnaıy monıtorıngtik top jetekshisi Anar Іzdenniń aıtýynsha, bul bastama jol jáne áleýmettik nysandar qurylysy, medıtsına, bilim berý jáne basqa salalarda sybaılas jemqorlyq kórinisterin baıqaǵan turǵyndarǵa pikirlerin ashyq aıtýǵa jáne jemqorlyqtyń aldyn-alýǵa múmkindik beredi.

Ádilet Qańtarbaev