Qyzylordada burynǵy kúıeýin óltirýge jendet jaldaǵan áıelge úkim shyqty
Atalmysh oqıǵa ótken jyldyń shilde aıynda bolǵan.
Áıel bul maqsatta Túrkistan oblysy turǵynyna tapsyrys beredi. Álgi adam buryn sotty bolǵan, burynǵy kúıeýiniń tsehynda jumys istegen. Áıel oǵan qyzmeti úshin 20 myń AQSh dollaryn beretinin aıtady.
Kásipker kúıeýi áıelimen ajyrasqannan keıin baspana, nan jáne tigin tsehy qurylǵylaryn, avtokran men jeńil avtokóligin áıeliniń atyna aýdaryp bergen. Basty sot talqylaýynda ol sottalýshyǵa barynsha jeńil jaza berýin surady.
Al 4 balaly áıeldiń qylmystyq pıǵylyn áshkereleý maqsatynda Túrkistan oblysynyń turǵyny oblystyq polıtsııa departamentine aryzdanǵan. Dereý sotqa deıingi tergep-tekserý bastalyp, tıisti sharalar qolǵa alyndy. Osylaısha aryz bergen azamat arnaıy kisi óltirýshi retinde belgilendi. Tapsyrys berýishiniń talabymen «kıller» jábirlenýshini «óltirgeni» jaıly oqıǵany dáleldeý úshin ımıtatsııa jasaıdy. Jábirlenýshi óltirgen áreketin kórsetedi. Jábirlenýshiniń ústine qan jaǵyp, pyshaq pen oǵan tıesili basqa da zattaryn uıaly telefonǵa túsiredi. Bul fotosýretti tapsyrys bergen áıelge jibergen.
«Qylmystyq pıǵyly tolyǵymen oryndalǵanyna kózi jetken soń tapsyrys bergen áıel qaltasynan 10 myń teńge shyǵaryp, ony «kıller» qyzmetin atqarǵan adamǵa jolaqy retinde beredi. Al burynǵy kúıeýiniń atyna tirkelgen múlikter balalaryna mura bolyp ótkennen keıin eńbekaqysyn beretinin aıtady. Bas sot talqylaýynda sottalýshy taǵylǵan aıypty moıyndaǵan joq. Sot úkimimen sottalýshy QR Qylmystyq kodeksiniń 24-babynyń 1-bóligi, 28-babynyń 4-bóligi, 99-babynyń 2-bóliginiń 8)-tarmaǵymen kináli dep tanylyp, ol 7 jyl 6 aıǵa bas bostandyǵynan aıyryldy», - dep málim etti Qyzylorda oblysynyń mamandandyrylǵan aýdanaralyq sotynyń baspasóz qyzmeti.