Qyzylordada búgin tirkelgen 4 naýqas koronavırýstyq ınfektsııany qaıdan juqtyrdy
Bul týraly Qyzylorda oblystyq densaýlyq saqtaý basqarmasynyń basshysy Jaqsylyq Abdýsametov málim etti.
«Qyzylorda oblysynda koronavırýs ınfektsııasy boıynsha 9 jaǵdaı tirkelgen. Búgin zerthanalyq synama negizinde taǵy 4 adamnan atalǵan dıagnoz anyqtaldy. Olardyń barlyǵy budan buryn tirkelgen naýqastarmen qarym-qatynasta bolǵan. Bul azamattar soǵan baılanysty karantınge alynyp, oqshaýlanǵan bolatyn. Olardan alynǵan zertteý oń nátıje kórsetti. Naýqastar statsıonarǵa, em alý maqsatynda jatqyzyldy. Atalǵan azamattarmen qarym-qatynasta bolýy múmkin adamdardyń tizimi naqtylanyp jatyr. Aldaǵy ýaqytta ol azamattar da oqshaýlandyrylady. Búgingi tańda oblystyń aýrýhanalarynda em alyp jatqan naýqastardyń jaǵdaıy birqalypty, emdeý jalǵasýda», – dedi Jaqsylyq Abdýsametov.
Qyzylordada 28 naýryzda koronavırýs juqtyrǵan alǵashqy adam tirkelse, 29 naýryzda ol naýqaspen qarym-qatynasta bolǵan medbıkeden de sol dıagnoz anyqtaldy. 30 naýryzda koronavırýs juqtyrǵan taǵy úsh naýqas naqtylandy.
Sondaı-aq, Qyzylorda oblysynyń ákimi Gúlshara Ábdiqalyqova oblys turǵyndaryna úndeý joldady.