Qyzylordada «bótelkelesin» óltirgen kúzetshi 12 jylǵa sottaldy
QYZYLORDA. QazAqparat - Qyzylorda oblysynyń qylmystyq ister jónindegi mamandandyrylǵan aýdanaralyq sotynyń úkimimen azamat B. adam óltirgen úshin 12 jylǵa bas bostandyǵynan aıyryldy. Bul týraly oblystyq sottyń keńse meńgerýshisi Qarakóz Sársenbaeva habarlady.
Oqıǵa Qyzylorda oblysyndaǵy munaı kenishteriniń birinde bolǵan. Keshkilik mezgilden bastap, araq ishken kúzetshiler sońynda biriniń sózin biri kótere almaı tóbelesip, aqyrynda túngi saǵat 12-den asqan kezde bireýi ekinshisine pyshaq salyp óltirgen.
Qaladan alys jerde ornalasqan kenishke jedel járdem jetpeı jatyp, pyshaqpen salynǵan aýyr jaraqattardan jábirlenýshi kóz jumǵan. Basty sot talqylaýynda sottalýshy kinásin moıyndamaı, qaıtys bolǵan adamnyń ózi birinshi oǵan pyshaqpen júgirgenin, sodan ekeýi tóbelesip jatqanda onyń qolyndaǵy pyshaǵy ózine qalaı kirip ketkenin bilmeıtindigin aıtty. Qylmystyq is boıynsha ótkizilgen sot medıtsınalyq krımınalıstıkalyq saraptamalardyń qorytyndylarymen jáne kýálerdiń bergen jaýaptarymen onyń kinási tolyǵymen dáleldendi. Sotta qaıtys bolǵan adamnyń ata-anasy sottalýshyǵa qatań jaza taǵaıyndaýdy jáne moraldyq shyǵyndy óndirýdi surady. Sot úkimimen sottalýshy B. adam óltirgen úshin kináli dep tanylyp, 12 /on eki/ jylǵa bas bostandyǵynan aıyryldy, jazasyn qatań rejımdegi túzeý kolonııasynda óteýge dep belgilendi. Jábirlenýshilerdiń azamattyq talaby ishinara qanaǵattandyrylyp, talapkerdiń paıdasyna sottalýshydan 1 500 000 (bir mıllıon bes júz myń) teńge moraldyq zııan óndirildi. Úkim zańdy kúshine engen joq. Sottalýshy men onyń qorǵaýshysy úkimge shaǵym keltirip, qazirgi kúni is apellıatsııalyq satyda qaralý ústinde.
