Qyzylordada bótelkelesin balǵamen uryp óltirgen azamatqa sot úkimi shyqty
QYZYLORDA. QazAqparat-Qyzylorda oblysynyń qylmystyq ister jónindegi mamandandyrylǵan aýdanaralyq soty 54 jastaǵy sottalýshyǵa qatysty qylmystyq isti qarap, aıyptaý úkimin jarııalady.
Bul týraly oblystyq sottyń baspasóz qyzmetinen málim etti, dep habarlady QazAqparat.
Bıylǵy jyldyń 14 shildesi kúni sottalýshy T. saıajaıdaǵy apasynyń úıiniń mańynan ótip bara jatqan tanys áıel, jábirlenýshi D-ny kezdestirip, ekeýi birge saıajaı aýlasynda otyryp, ishimdik ishken.
Otyrys barysynda mas kúıindegi D. sottalýshy T. men onyń marqum bolǵan inisi ekeýi úı-jaılary joq qańǵybas ekenderin aıtyp, namysqa tıer sózdermen balaǵattaǵan. Budan keıin aralarynda janjal týyndaǵan. Sol sátte, mas kúıindegi sottalýshy D-ny uryp-soqqan.
Osydan soń, azamat T. sáki janynda jatqan temir sapty balǵamen jábirlenýshiniń basynan urǵan. Jábirlenýshi D. úıge júgirip kirip, jasyrynbaqshy bolǵan. Alaıda, sottalýshy T. ony úıdiń aýlasyna qaıta alyp shyǵyp, basynan balǵamen taǵy birneshe márte urǵan. Aýyr dárejedegi dene jaraqattaryn alǵan jábirlenýshi oqıǵa ornynda kóz jumdy.
Odan keıin, sottalýshy jábirlenýshiniń uıaly telefonyn alyp, D-nyń denesin úı aýlasyndaǵy jerge kómip tastaǵan.
Sot úkimimen sottalýshy T. Qazaqstan Respýblıkasynyń Qylmystyq kodeksiniń 99-babynyń 1-bóligimen (adam óltirý) jáne 188-babynyń 1-bóligimen (urlyq) kináli dep tanylyp, 9 jylǵa bas bostandyǵynan aıyryldy. Jazasyn qatań rejımdegi túzeý kolonııasynda óteıdi. Úkim zańdy kúshine engen joq.
