Qyzylordada bokstan eresekter arasynda jazǵy spartakıada bastaldy
Jarys 2-7 mamyr aralyǵynda ótedi. Oǵan elimizdiń barlyq óńirinen bylǵary qolǵap sheberleri keldi.
Bokstan elimizdiń ulttyq quramasynyń bas bapkeri Ǵalymbek Kenjebaevtyń aıtýynsha, jaqynda Taılandta ótken Azııa chempıonatynda baq synaǵan sportshylarymyz bul jarysqa qatyspaıdy. Sebebi eki jarystyń arasy óte jaqyn. Olar tolyq qalpyna kelip úlgermeıdi.
«Biz spartakıadada ulttyq quramaǵa úmitker boksshylardy tańdaımyz. Sondaı-aq, shilde aıynda Azııa chempıonatynda baq synaǵan boksshylardyń qatysýymen Prezıdent kýbogy sarapqa salynady. Sol dúbirli dodada qaı boksshynyń babynda ekeni tarazyǵa tartylady. Sondyqtan spartakıadaǵa qatysqan sportshylar arasynan aldaǵy ýaqytta ulttyq quramaǵa shaqyrý alatyn jigitter shyǵýy múmkin», - dedi Ǵalymbek Kenjebaev.
Aıta keteıik, jarysqa elimizdiń barlyq óńirinen 10 salmaq dárejesinde 150-ge tarta boksshy qatysady.
Sońǵy jyldary Qyzylordada boks joǵary deńgeıde damyp keledi. Syr topyraǵynan shyqqan Qamshybek Qońqabaev Álem chempıonatynda kúmis júldeger atandy. Jaqynda ótken Azııa chempıonatynda Tursynbaı Qulahmet chempıon atansa, Qamshybek Qońqabaev ekinshi oryn aldy.
«Qazirgi tańda Qyzylorda oblysynda boks sportymen jalpy 4 myńǵa jýyq sportshy shuǵyldanady. Onyń ishinde balalar-jasóspirimderdiń 18 sport mektebinde 2552 bala sheberligin shyndaýda. Búgingi boksshylarǵa úlgi bolǵan sport sheberi, Ýnıversıada jeńimpazy Naqyshbek Kóbekov, 2012 jylǵy London Olımpıadasynyń qola júldegeri Marına Volnovanyń jetistikterin joǵary baǵalaımyz. Sondaı-aq, jaqynda Azııa chempıonatynda oblys abyroıyn asqaqtatqan Qamshybek Qońqabaev pen Tursynaı Qulahmet el mereıin tasytty», - dedi Qyzylorda oblysy ákiminiń orynbasary Rýslan Rústemov.
Aıta keteıik, sporttyń 40 túrinen V jazǵy spartakıada respýblıka boıynsha aǵymdaǵy jyldyń aqpan aıynan bastap ótkizilip keledi. Sonyń ishinde Qyzylorda oblysynda gandbol men bokstan spartakıada ótkizý josparlanǵan.