Qyzylordada bızneske arnalǵan jerler tuńǵysh ret aýktsıonda satyldy
QYZYLORDA. QazAqparat - Qyzylordada tuńǵysh ret kásipkerlik maqsattaǵy jer telimderine arnalǵan aýktsıon ótti, dep habarlady QazAqparat tilshisi oblystyq kásipkerler palatasyna silteme jasap.
Osydan birneshe kún buryn Kásipkerler palatasynyń dırektory Ǵalymbek Jaqsylyqov áleýmettik jelidegi paraqshasynda: «Dostar! Dál qazir qýanyshty sezimde turmyn. Erekshe jańalyqpen, Siz ben biz bolyp birge jasaǵan jumystyń nátıjesimen bóliskim kelip otyr. Esterińizde me, «kásipkerlik maqsattaǵy jer telimderine jarııalanatyn aýktsıon týraly aqparatty kásipkerler der kezinde ala almaıdy, aqparat jetkiliksiz», dep jergilikti atqarýshy organnyń aldynda másele qoıǵan bolatynbyz. Búgin qalalyq jer qatynastary bóliminen «Usynystaryńyzǵa sáıkes, aǵymdaǵy jyldyń 11 qarashasynda bolatyn kezekti aýktsıon Qyzylorda qalasy, Áıteke bı kóshesi, № 28 meken-jaıynda ornalasqan Qyzylorda oblysynyń Óńirlik kásipkerler palatasynyń májilis zalynda ótkiziletin boldy», degen resmı hat aldyq. Iá, ıá, qatelesken joqsyzdar, kásipkerlik maqsattaǵy jer telimderine arnalǵan aýktsıon ashyq ári jarııaly negizde bizdiń Kásipkerler palatasynyń ǵımaratynda ótedi», - degen jazba qaldyrǵan bolatyn.
Senbi kúni qalalyq jer qatynastary bólimi Kásipkerler palatasynda jer telimderin aýktsıon tásilimen berý sharasyn ótkizdi. Sharaǵa 33 jer telimi usynylyp, qyzyǵýshylyq tanytqan kásipkerlerdiń qarasy basym boldy.
Sharany uıymdastyrýshylardyń biri palata qyzmetkeri Gaýhar Eleýsinova: «Aýktsıonnyń tartysty bolǵany sonshalyqty, tipti bir lotqa qatysqan 4 kásipkerdiń arasynda talas bolyp, jer telimin 12 mln.teńgege deıin baǵalaǵandary boldy. Al jalpy aýyl sharýashylyǵy úshin jer telimderin jyl saıynǵy jaldaý baǵasy tıimdi, kásipkerlerdiń qaltasy kóteretindeı», - deıdi.
Aıta ketý kerek, Qyzylordada jer telimderi týraly tolyq aqparatpen qamtıtyn www.kyzylorda-zher.kz saıty ashyldy. Saıtta aýktsıonǵa shyǵarylatyn jer telimderi týraly (meken-jaıy, syzbasy, nysanaly maqsaty, jer paıdalaný quqyǵy, jer teliminiń bastapqy baǵasy, aýktsıonǵa qatysý úshin tólenetin jarna pul t.b.) tolyq aqparat berilgen.
Aýktsıonǵa «Ǵımaratqa qyzmet kórsetý úshin» jáne «Ózindik kásipkerlikke negizdelgen sharýa qojalyǵyn júrgizý úshin» jer telimderi usynylady. Aýktsıonǵa qatysýǵa nıet bildirgen jaǵdaıda óz zańdylyǵyna sáıkes qalalyq jer qatynastary bólimine baryp, aldyn ala tıisti tólemdi tóleý arqyly ótinish bildirseńiz, aýktsıonǵa shaqyrtý ala alasyz. 
Kelesi aýktsıon jeltoqsan aıynda ótkiziledi dep josparlanyp otyr.
