Qyzylordada bıylǵy jyl kásipkerlikti qoldaý jyly bolyp jarııalandy
QYZYLORDA.QazAqparat-Memlekettik baǵdarlamalardyń tıimdiliginiń nátıjesinde Qyzylorda oblysynda kásipkerlikke bet burǵandardyń úlesi 22-den 26%-ǵa ósti. Al, turaqty jumys istep turǵan shaǵyn jáne orta bıznes sýbektileriniń sany ótken jyly 5,2%-ǵa artty. Bul týraly Qyzylorda oblysynyń ákimi Q.Kósherbaev halyqqa esep berý kezdesýinde aıtty, dep habarlady QazAqparat tilshisi.
«Sońǵy jarty jylda 16 myńnan astam adamdy kásipkerlikke tartýǵa qol jetkizdik. Alaıda, bul - múldem biz kózdegen nátıje emes. Bizdiń maqsatymyz - jalpy óńirlik ónim kólemindegi shaǵyn jáne orta bıznestiń úlesin 45-50%-ǵa deıin jetkizý jáne osy baǵytta jumys isteýdemiz»,- dep atap ótti aımaq basshysy.
Esterińizge sala keteıik, birer kún buryn oblys ákimdigi, máslıhat, «Nur Otan» partııasynyń fılıaly jáne Qoǵamdyq keńes 2018 jyldy oblys boıynsha «Jappaı kásipkerlikti qoldaý jyly» dep jarııalaý týraly birlesken sheshim qabyldady. Óńirde «Jol kartasy» keshendi baǵdarlamasy ázirlenip, ony júzege asyrý úshin aǵymdaǵy jyly barlyq qarjy kózderi esebinen 32 mlrd. teńgeden astam qarjy bólý josparlanyp otyr.
Halyqpen kezdesý kezinde aımaq basshysy oblysta ınvestorlarmen birleskip eksportqa beıimdelgen 10 iri óndiristik joba júzege asyp jatqandyǵyn jetkizdi. Máselen, túrik ınvestorlardyń atsalysýymen keramıkalyq plıta jáne granıt shyǵaratyn zaýyt salynbaq.
«Jazǵa qaraı, Túrkııalyq «Yıldızlar SSS Holding» kompanııalar tobymen birlesip, jylyna 27 mln. sharshy metrge deıin keramıkalyq plıta jáne granıt shyǵaratyn zaýyt qurylysyn júrgizetin bolamyz. Bıyl jobanyń birinshi kezeńiniń qurylysy bastalady, qýaty - 9 mln. sharshy metr. Osy jyldyń kókteminde Aral qalasynda kaltsıılendirilgen soda shyǵaratyn zaýyt qurylysyna kirisemiz. Bul - respýblıka boıynsha, tolyǵymen shet elderden jetkiziletin kaltsıılendirilgen sodanyń 75%-yn otandyq ónimmen qamtamasyz etetin alǵashqy zamanaýı zaýyt bolmaq»,-dedi aımaq basshysy.
Munan ózge ol resmı málimetter boıynsha, agroónerkásip kesheniniń negizgi kapıtalyna 11 mlrd teńge ınvestıtsııa tartylǵanyn aıtty.
«Osy ýaqytqa deıin resmı málimetter boıynsha, agroónerkásip kesheniniń negizgi kapıtalyna 11 mlrd teńge ınvestıtsııa tartylǵan. ıAǵnı, sońǵy 5 jylda osy salaǵa quıylǵan ınvestıtsııa kólemi 23 esege artty. Bul bizdiń aýylsharýashylyǵy ónimin óndirýshilerimizdiń qarjylyq múmkindikterin, olardyń damyǵandyǵyn kórsetedi. Nátıjesinde, birneshe jyl qatarynan aýyl sharýashylyǵy óndirisiniń ósimine qol jetkizip otyrmyz. 2017 jyly bul kórsetkish 4,1 paıyzǵa artyp otyr», - dedi óńir basshysy.
Kezdesýde aımaq basshysy Syrdarııanyń sol jaǵalaýynda alǵashqy móltek aýdan paıdalanýǵa beriletinin jetkizdi.
«Sońǵy 5 jylda áleýmettik salanyń 200 nysany paıdalanýǵa berildi, bul densaýlyq saqtaý, bilim berý, sport jáne mádenıet nysandary. Biz 2013 jyldyń basyna deıin kúrmeýi sheshilmegen problema sanalǵan mıllıardtaǵan qarjynyń qurylysyn, 34 áleýmettik nysandy salyp bitirdik», - dep málimdedi aımaq basshysy.
Sonymen qatar aımaqta úsh aýysymdy bilim berý máselesi merziminen buryn oryndaldy, apatty mektepter problemasy sheshildi. Jýyrda jerasty sýynyń kóterilýine baılanysty № 34 mektep te apatty dep tanyldy. Ákimdik jańa mektep ǵımaratynyń qurylysyn jyl sońyna deıin salýdy josparlap otyr. Jalpy alǵanda, aımaqta 5 jyl ishinde 45 mektep, onyń 37-si apatty nysandardyń ornyna salyndy.
«Munan bólek aldaǵy 2 jylda taǵy 8 nysannyń qurylysy júredi»,-dedi ákim kezdesýde.
Sondaı-aq dedi ol: «2017 jyly densaýlyq saqtaý salasyndaǵy apatty nysandardyń máselesin sheshý jáne olardyń materıaldyq-tehnıkalyq bazasyn nyǵaıtýǵa basymdyq berildi. Júıeli jumystyń nátıjesinde apattyq nysandar problemasy sheshilip jatyr. 5 jylda salynǵan 57 nysannyń 49-y apatty obektilerdiń ornyna boı kóterip, jańalandy. Qalǵan 8 nysannyń qurylysyn aldaǵy 2 jylda bitiremiz dep josparlap otyrmyz. Ótken jyly Qazaly aýdany Áıteke bı kentinen 150 oryndyq aýdandyq aýrýhana paıdalanýǵa berildi. Bıyl Aral aýdanynda 150 oryndyq ortalyq aýrýhana ashylady. Keler jyly Shıelidegi aýdandyq aýrýhananyń qurylysyn támamdaımyz. Sondaı-aq, Jańaqorǵan aýdanyndaǵy 250 kelýshige arnalǵan emhanany salyp bitiremiz»,-dep atap ótti aımaq basshysy.
Óńir jetistikterine keńinen toqtalǵan ákim óz esebin bylaısha jalǵady: «Bıyl Jalaǵash kentindegi apatty jaǵdaıdaǵy 100 oryndyq aýrýhananyń jobasyn ázirleý jumystaryn aıaqtap, jyl sońyna deıin qurylysyn bastap ketýge kúsh salamyz. Densaýlyq saqtaý salasyndaǵy taǵy 24 jobany memlekettik-jekemenshik áriptestik aıasynda júzege asyramyz, ıaǵnı 15 dárigerlik ambýlatorııa, 3 emhananyń jobalyq qujattaryn daıyndap, qurylysyna kirisemiz. Medıtsınalyq qondyrǵy alý maqsatynda 6 jobany iske asyramyz», - dedi oblys ákimi.
Jalpy ótken jyly atqarylǵan isterdiń kólemi óte aýqymdy boldy. Kezdesýde kópshilik óńir basshysynyń jyl boıy atqarǵan isterine oń baǵa berdi.
