Qyzylordada bıyl órt saldarynan 4 adam kóz jumǵan
QYZYLORDA. QazAqparat - Qyzylorda oblysynda órt saldarynan jyl basynan beri 4 adam qaza boldy. Bıyl 66 órt oqıǵasy bolǵan, dep habarlaıdy QazAqparat tilshisi.
Órttiń 38-i turǵyn úı sektorynda boldy. Ol jalpy órt oqıǵasynyń 57 paıyzyn quraıdy. Oblystyq tótenshe jaǵdaılar departamentiniń málimetine súıensek, adamdardyń qaza bolý sebepteriniń 75 paıyzy ýly gazben ýlanýmen baılanysty bolyp otyr.
«Mundaı jaǵdaılardyń bolý sebepterine úńilsek, kóp jaǵdaıda qaıǵyly jaǵda murjadaǵy aqaý, pesh salý jáne pesh qondyrý kezindegi erejelerdiń buzylýynan bolyp jatady. Máselen, jyl basynan beri 8 kómirqyshqyl gazynan ýlaný oqıǵasy tirkeldi. Sondaı-aq, gazdan ýlaný oqıǵalary da kezdesip, odan 2 adam zııan shekti», - dedi Qyzylorda oblystyq tótenshe jaǵdaılar departamentiniń memlekettik til jáne aqparat tobynyń bas mamany Aıgúl Nurmanova.
Qazirgi tańda oblystyq tótenshe jaǵdaılar departamentiniń mamandary osy baǵytta túsindirý jumystaryn júrgizip jatyr.
Budan buryn Qyzylordada úı qabyrǵasy qulap, 2 áıel úıindi astynda qalǵanyn habarlaǵan edik.
