Qyzylordada bıyl koronavırýs juqtyrǵan azamattardyń deni oblys ortalyǵynda turady
QYZYLORDA. QazAqparat - Qyzylordada qańtar aıynda koronavırýs juqtyrǵan azamattardyń basym bóligi Qyzylorda qalasynda turady, dep habarlaıdy QazAqparat tilshisi.
Sońǵy aptada óńirde 65 adam qaterli indetke shaldyqty. Olardyń arasynda 55-iniń oblys ortalyǵynda turady.
«Keıingi ýaqytta oblysta koronavırýs juqtyrǵan azamattardyń kóbeıip bara jatqany alańdatyp otyr. Máselen, jyl basynan beri Qyzylordada 217 adam qaterli indettiń qursaýyna ilikken. Naýqastardyń basym kópshiligi oblys ortalyǵynda turatyny belgili boldy. Sondyqtan turǵyndardan barlyq saqtyq sharalaryna nazar aýdarýyn suraımyz», - dep málim etti Qyzylorda oblysy sanıtarııalyq-epıdemıologııalyq baqylaý departamentiniń baspasóz qyzmeti.
Oblystyq óńirlik kommýnıkatsııalar qyzmetiniń habarlaýynsha, búgin oblysta koronavırýs ınfektsııasyna qarsy vaktsına salý bastaldy . Óńirge búgin «Spýtnık V» vaktsınasynyń 1 myń dozasy keldi. Jalpy, jyl ishinde 80 myń doza kezeń kezeńimen jetkiziledi. Birinshi kezekte erikti túrde medıtsına qyzmetkerlerine, pedagogterge, sozylmaly aýrýlarmen syrqatanatyn toptaǵy adamdarǵa salynady. Oblys boıynsha 14 egý kabıneti belgilendi. Budan bólek, shalǵaı eldi mekende turatyn azamattarǵa vaktsına salý úshin 46 jyljymaly egý brıgadasy uıymdastyryldy.
