Qyzylordada bıyl kent jáne aýyldyq okrýgterdi damytýǵa mán berildi
Qalaǵa qarasty Qyzylózek aýyldyq okrýginde bıyl 8 joba qolǵa alynǵan. Onyń ishinde 3 nysanǵa atalǵan baǵdarlama negizinde qarjy bólingen. Bul boıynsha 60 adam eńbekpen qamtylǵan. Sol arqyly Qaraózek beketindegi 2,5 shaqyrymdy quraıtyn ortalyq kóshedegi jolǵa ortasha jóndeý júrgizilip, asfalt salynady. Al uzyndyǵy 1,5 shaqyrymǵa sozylatyn J. Jabaev kóshesine qıyrshyq tas tóselýde. Baǵdarlama aıasynda bekettiń jol máselesimen turǵyndardy aýyz sýmen qamtý máselesi oń sheshimin taýyp jatyr.
Qyzylorda qalasynyń ákimi Nurlybek Nálibaev pen QR Parlamenti Senatynyń depýtaty Murat Baqtııaruly men eldi mekendi aralaý barysynda onda atqarylyp jatqan jumys barysymen tanysty. Atqarylyp jatqan jobalar boıynsha tıisti mekeme mamandarymen pikirlesti.
2013-2019 jyldar aralyǵynda memlekettik-jekeshelik áriptestik aıasynda qalaǵa qarasty kent jáne aýyldyq okrýgterde barlyǵy 7 dárigerlik ambýlatorııa salyndy. Solardyń biri - Qyzylózektegi dárigerlik ambýlatorııa ótken jyly boı kótergen bolatyn. Onda jergilikti turǵyndar qala basshysyna dáriger qajet degen ótinishin jetkizdi. Buǵan baılanysty qala ákimi tıisti sala basshylaryna atalǵan máseleni tezirek sheshý jóninde tapsyrma berdi.
Qyzylózekpen irgeles jatqan Talsýat aýyldyq okrýginde 2500-ge adam turady. Munda atalǵan baǵdarlama boıynsha bıyl 8 kóshe kúrdeli jóndeýden ótýde.
Nurlybek Nálibaev bıyl basty nazarda Qyzylorda qalasyna qarasty 2 kent, 7 aýyldyq okrýgti damytý máselesi ustalyp otyrǵanyn jetkizdi. Nátıjesinde eldi mekenderdiń kire beris joly, qoǵamdyq kólik júretin negizgi kósheler, balabaqshaǵa, mektepke qatynaıtyn joldayń barlyǵy asfalttalady. Sondaı-aq,, jaıaý júrginshi joldary salynady.
Osyndaı ıgilikti isterdiń nátıjesinde Talsýatta bıyl 3,3 shaqyrymdy quraıtyn tórt kóshege «Jumyspen qamtý jol kartasyna» saı qarjy qaralǵan. Al bir kóshe «Óńirlerdi damytý» boıynsha jóndelýde. Demeýshilik esebinen taǵy 3 kóshege asfalt tóseledi.
Oblys ortalyǵymen irgeles jatqan Tasbóget kenti -turǵyndar jıi qonystanǵan eldi mekenniń biri. Ol buryn aýdan ortalyǵy bolǵan. Sondyqtan kóptegen túıtkilder sheshimin tapqan. Kentte kóshelerdiń 70 paıyzdan astamy asfalttalǵan.
Qala irgesindegi kentte bıyl 3,9 shaqyrymdy quraıtyn 3 kóshe kúrdeli jóndeýden ótýde. Qazirgi ýaqytta tas tóseý jumystary aıaqtalyp, negizgi jumystar bastalǵan. Kúrdeli jóndeý T.Batyrshaev, Syrdarııa, J. Bákishov kóshelerinde júrgizilýde.
Aıta ketý kerek, bıyl «Jumyspen qamtý jol kartasy» baǵdarlamasy aıasynda qala aýmaǵyndaǵy kóppáterli úılerdiń aýlalaryna 30 oıyn alańy salynýda. Oǵan qosaa qala aýmaǵynan 3 jerge sporttyq-jattyǵý alańdarynyń qurylysy júrgizilýde. Sonymen qatar 60 oıyn alańy qaıta jańǵyrtylýda.
