Qyzylordada bıyl 4,2 mln tonna munaı óndiriledi
Qyzylorda oblysynyń ákimi Gúlshara Ábdiqalyqova «KazMunaıGaz» aktsıonerlik qoǵamy Basqarma tóraǵasynyń orynbasary Jaqyp Marabaevty qabyldady. Júzdesýde Syr óńiriniń damý baǵytynda birlesip atqarylatyn jumystar saralandy,
Oblys ákimi munaı kompanııasynyń óńir ekonomıkasyn damytýdaǵy orny erekshe ekenin atap ótti.
«Munaı kompanııalary - óńir damýynyń lokomotıvi. Bıyl óńirde 4,2 mln. tonna munaı óndiriletin bolsa, onyń eń joǵarǵy úlesi - 35,2 paıyzy «KazGerMunaı» birikken kásipornyna tıesili. Kompanııa - elimizde alǵashqylar qatarynda kenishterdi ıgerýge, sol arqyly eńbek ónimdiligin arttyrýǵa, shyǵyndardy azaıtýǵa múmkindik beretin aqyldy tehnologııalardy engizdi. Sonymen qatar, aımaqty kógildir otynmen qamtamasyz etip otyrǵan birden-bir kásiporyn», - dedi Gúlshara Ábdiqalyqova.
Júzdesý barysynda Jaqyp Marabaev «KazGerMunaı» birikken kásiporny» seriktestiginiń Bas dırektorynyń orynbasary Murat Mustafaevtyń jańa qyzmetke aýysýyna baılanysty onyń ornyna Nurjan Ábdirahmanovty tanystyrdy.
Oblys ákimi Gúlshara Ábdiqalyqova jańa qyzmetke kelgen Nurjan Ábdirahmanovtyń aldaǵy jumysyna tabys tiledi.
Eske salsaq, Qyzylordada bıyl óńirge 186 mlrd teńgeden astam ınvestıtsııa tartyldy.
