Qyzylordada bıyl 30 áleýmettik nysan paıdalanýǵa beriledi
QYZYLORDA. QazAqparat - Qyzylorda oblysynda jyl sońyna deıin 30 áleýmettik nysandy paıdalanýǵa berý josparlanyp otyr, dep habarlaıdy QazAqparat tilshisi.
Jyl basynan beri 41 áleýmettik nysannyń qurylysy júrgizildi. Onyń ishinde ótken jyldan ótpeli nysan -33, qurylysy jańadan bastalǵany - 8. Al 11 nysan 2019 jyly el ıgiligine aınalady dep kútilýde. Oǵan respýblıkalyq jáne oblystyq bıýdjet esebinen 27,6 mlrd teńge qarjy bólingen.
Oblys ákiminiń orynbasary Serik Súleımenovtiń aıtýynsha, «Nurly jer» baǵdarlamasy aıasynda bıyl oblys boıynsha 69 kóppáterli turǵyn úıdiń qurylysy júrgizilýde. Ol 1747 páterdi qurap, aýmaǵy 123,3 myń sharshy metrdi shamalap otyr. Onyń ishinde 21 úı jeke qurylys kompanııalary esebinen salynýda.
Qazirgi tańda oblys boıynsha 40 ınjenerlik ınfraqurylym jobalary boıynsha barlyǵy 495 shaqyrym jeli tartylǵan.
«2018 jyldyń I-shi jartyjyldyǵynda memlekettik pen jeke ınvestıtsııalar esebinen salynatyn nysandarǵa qurylys-montaj jumystaryn júrgizý (bastaý) týraly 141 habarlama túsken. Onyń 63-i bıýdjet qarajaty esebinen salynyp jatqan qurylystar (35-i jańa qurylys), al qalǵan 78-i jeke qarajattaryna salynyp jatqan nysandar», - dedi oblys ákiminiń orynbasary Serik Súleımenov.
Aıta keteıik, oblys kóleminde Qyzylorda oblysynyń memlekettik sáýlet-qurylys baqylaý basqarmasy arqyly basqarmamen jalpy sany 195 tekserý júrgizilgen. Onyń ishinde 83 jospardan tys jáne baqylaýdyń ózge de nysandardy tekserý boıynsha 112 tekserý júrgizilip, tekserýler boıynsha 56 nusqama berilip otyr.
