Qyzylordada bıyl 18-ge tolǵan egiz qyzdar alǵash ret daýys berdi

QYZYLORDA. QazAqparat - Qyzylorda oblysynda bıyl 18 jasqa tolǵan egiz qyzdar referendýmǵa qatysyp, alǵash ret tańdaý jasady, dep habarlaıdy QazAqparat tilshisi.

Qarmaqshy aýdany Turmaǵambet aýylynda turatyn egizder Ulbolsyn jáne Ulmeken Muratqyzy bıyl kámelet jasyna toldy.

Egizder Qyzylorda qalasyndaǵy «Bolashaq» kolledjinde «akýsher» mamandyǵy boıynsha bir topta bilim alady.

Qos qyz № 109 referendým ýchaskesinde daýys berdi.

«Biz kámelet jasyna tolyp, referendýmǵa alǵash ret qatysyp otyrmyz. Sondyqtan bul - biz úshin óte mańyzdy qadam. Elimizde amandyq, beıbitshilik bolsyn», - dedi Ulbolsyn Muratqyzy.

Otbasynda alty bala bar. Ulbolsyn men Ulmeken - otbasynyń ortanshysy.

Aıta keteıik, aımaqta 373 daýys berý ýchaskesi bar. Onda 462685 daýys berýshi tirkelgen.

Eske sala keteıik, budan buryn Qyzylordada 101 jastaǵy maıdanger alǵashqy bolyp daýys berdi.

Al búgin 18 jasqa tolǵan qyzylordalyq daýys berýge alǵash ret qatysty.

Sondaı-aq, Qyzylordada shekara beketindegi áskerı mamandar jáne búgin shańyraq kótergen jas jubaılar daýys berdi.

Qyzylordada jergilikti «Qaısar» komandasynyń oıynshylary tańdaýyn jasady.

Aıta ketsek, referendýmǵa qatysýdan Qyzylorda oblysy kósh bastap tur.