Qyzylordada bıyl 15 adam Kongo-qyrym qandy bezgegine shaldyqty
Atalǵan aýrýmen syrqattanǵan azamattardyń kópshiligi aýyr jaǵdaıda emdeý oryndaryna jetkizildi. Olardyń 70 paıyzynda klınıkalyq belgiler bolǵanymen ýaqytyly medıtsınalyq kómekke júginbegen.
«Oblysta kongo-qyrym qandy bezgegin qozdyrýshy keneniń 16 túri bar. Saldarynan jyldan-jylǵa aýrý tasymaldaýshy keneler túri kóbeıip barady. Elimiz boıynsha kenelerdiń zaqymdalý kórsetkishi ortasha eseppen 4,2 bolsa, Qyzylorda oblysynyń kórsetkishi odan joǵary. Bul alańdatarlyq jaǵdaı. Kongo-qyrym qandy bezgegi ásirese mamyr jáne maýsym aılarynda belsendiligi óte joǵary bolady. Sondyqtan árbir azamat dalalyq jerde nemese úı janýarlarynyń qasynda mindetti túrde saqtyq sharalaryn umytpaý kerek», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.
Oblystyq juqpaly aýrýlar aýrýhanasyna túsken naýqastardyń barlyǵy osy bir aptanyń ishinde aýyrǵandar. Olar aýrýhanaǵa kelgen kúnnen bastap arnaıy preparattar berilip, 3 ret zerthanalyq tekseristen ótedi.
«Kongo-qyrym qandy bezgeginiń basty belgileri - bas aınalý, júrek aıný, dene qyzbasy jáne ish ótý. Bul belgilerden bólek tistiń qanaýy nemese muryn qanaýy bolýy múmkin. Eger osy sıptomdar baıqalsa jedel túrde medıtsınalyq tekseristen ótý qajet. Sebebi aýrý asqanyp ketýi múmkin», - dedi oblystyq juqpaly aýrýlar aýrýhanasynyń bas dárigeri Aına Muhambetova.
Ádiljan Úmbet.
