Qyzylordada birneshe márte urlyq jasady degen kúdikti azamat ustaldy
QYZYLORDA. QazAqparat-Qyzylorda qalalyq ishki ister basqarmasynyń qyzmetkerleri bótenniń múlkin zańsyz ıemdenip, azamattarǵa jalpy kólemi 200 myń teńgege jýyq shyǵyn keltirgen 50 jastaǵy qala turǵynyn ustady,-dep habarlady QazAqparat tilshisi oblystyq ІІD silteme jasap.
Bıylǵy jyldyń 14-sáýiri kúni qala ortalyǵyndaǵy jeke kásipkerlik mekemelerdiń biriniń seıfinen 25 000 teńge kóleminde aqsha jáne 3 dana fleshka urlanǵany jóninde habarlama kelip túsedi. Tekserý barysynda, kúdikti ǵımaratqa syrtqy esiktiń ashyq qalǵandyǵyn paıdalaný arqyly kirip, ońtaıly sátti kútip, seıftegi aqshany alyp ketkendigi anyqtaldy. Nátıjesinde jábirlenýshige 31 000 teńge kóleminde shyǵyn keltirilgen.
Osy tektes urlyq deregi sáýir aıynyń 16 kúni de tirkelgen. Bul jaǵdaıda monsha aýlasynda turǵan «Ýral» úlgisindegi velosıped urlanǵan. Shyǵyn kólemi 20 000 teńgeni quraǵan.
Sonymen qatar, 27 sáýir kúni 2 telefon urlyǵy tirkelgen. Eki urlyq faktisi de qala ortalyǵyndaǵy kolledj jataqhanasynyń birinde bolǵan. 17 jáne 16 jastaǵy kolledj stýdentteriniń «Samsýng J-1» úlgisindegi uıaly telefony qoldy bolyp, árqaısysyna 50 000 teńge kóleminde shyǵyn keltirilgen.
Osy bóten urlyq qylmystaryn jasady degen kúdikpen Qyzylorda qalasynyń 50 jastaǵy turǵyny ustalyp, Ýaqytsha ustaý ızolıatoryna qamaýǵa alyndy. Kúdikti mamyr aıynyń 02 kúni qala ortalyǵyndaǵy dúkenderdiń birinen «Nokııa H-1» úlgisindegi uıaly telefonyn urlaýǵa oqtalyp turǵan sátinde quryqtaldy. Oǵan qatysty Qazaqstan Respýblıkasy Qylmystyq kodeksiniń 188-baby 2-bóligi boıynsha qylmystyq is qozǵalyp, sotqa deıingi tergep-tekserý amaldary júrgizilýde.
