Qyzylordada birneshe márte páter urlyǵyn jasaǵan azamatsha ustaldy
Qyzylorda qalasy polıtsııa basqarmasy qyzmetkerleri bul maqsatta jedel-izdestirý sharalaryn júrgizdi. Nátıjesinde 24 jastaǵy azamatsha tártip saqshylarynyń qolyna tústi. Ol Baıqońyr qalasynda turady. Esh jerde jumys istemeıdi.
Bıyl qańtar men sáýir aılary aralyǵynda birneshe jábirlenýshi qalalyq polıtsııa basqarmasynyń kezekshi bólimine shaǵym túsirgen edi. Onda páterlerinen aqsha jáne zergerlik buıymdary urlanǵany aıtylǵan. Urlyq negizinen kúndizgi ýaqytta jasalǵan. Ol kiltterdi irikteý arqyly júzege asyp otyrǵan.
Kúdikti azamatsha sáýir aıynan bastap aptasyna eki márte páter tonaǵan. Tekserý barysynda ol atalmysh urlyqtarǵa qatysy baryn joqqa shyǵarǵan joq.
Suǵanaq qoldy azamatsha Qyzylorda qalasynan qonaq úı jaldaǵan. Tekserý barysynda qonaq úı bólmesinen dálel retinde altyn jáne kúmis zergerlik buıymdar alyndy. Sondaı-aq, kúdiktiden aqsha da tárkilendi.
«Qazirgi tańda jábirlenýshilerge keltirilgen materıaldyq zalal somasy eseptelip jatyr. Polıtsııa kúdiktiniń 28 urlyq qylmysyna qatysy bar ekendigin anyqtady. Oǵan qatysty QR Qylmystyq kodeksiniń 188-babynyń 3-bóligimen sotqa deıingi tergep-tekserý júrgizilýde. Bıylǵy aqpan aıynda qylmystyq zańnamaǵa engizilgen ózgeristerge sáıkes birneshe ret jasalǵan urlyq aýyr qylmys sanatyna jatqyzylady. Endi taraptardyń tatýlasýyna baılanysty qylmystyq is toqtatylmaıdy. Ondaı qylmys jasaǵandar 7 jylǵa deıin bas bostandyǵynan aıyrylady. Kúdikti ýaqytsha ustaý ızolıatoryna qamaqqa alyndy», - dep málim etti Qyzylorda oblystyq polıtsııa departamentiniń baspasóz qyzmeti.