Qyzylordada birneshe adamdy aldap ketken alaıaqqa úkim shyqty
QYZYLORDA. QazAqparat - Qazaly aýdandyq sotynda alaıaqtyq qylmysyn jasaǵan sottalýshy T-ǵa qatysty qylmystyq is qaraldy, - dep habarlady QazAqparat HAA tilshisi.
Sottalýshy T. 2016 jyly jábirlenýshiler K., R., G.-lerge bank arqyly 10 000 000 teńge nesıe alyp berýge ýáde etip, alǵashqy qujattaryn jasaý úshin 600 000 teńge kerek dep, ol qarjyny bas paıdasyna jaratyp, jábirlenýshilerge múliktik zııan keltirgen.
Basty sot talqylaýynda sottalýshynyń kinási aıybyn moıyndap bergen jaýabymen, jábirlenýshiler men kýálardyń jaýaptarymen tolyq dáleldenip, bekitildi.
Sot úkimimen sottalýshy T. Qazaqstan Respýblıkasy QK-niń 190-babynyń 2-bóliginiń 2-tarmaǵymen kináli dep tanylyp, oǵan onyń menshigindegi zańsyz jolmen tabylǵan qarajatqa satyp alynǵan múlkin tárkileı otyryp, 2 jylǵa bas bostandyǵyn shekteý jazasy taǵaıyndaldy. Sol merzimge probatsııalyq baqylaý belgilendi.
«Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly» Zańynyń 2-babynyń 2-bóliginiń 2-tarmaǵyna sáıkes taǵaıyndalǵan negizgi jazadan bosatyldy. Sottalýshy T-dan jábirlenýshilerdiń paıdasyna keltirilgen múliktik zalal jáne memleket paıdasyna memlekettik baj alymdary óndirildi.
Sot úkimi zańdy kúshine enbegen.
