Qyzylordada birlesken kompanııalar jumysshylardyń quqyǵyn buzyp kelgen
QYZYLORDA. QazAqparat - Qyzylorda oblysyndaǵy birlesken kásiporyndarda otandyq jáne sheteldik jumysshylardyń quqyǵy buzylyp kelgen, dep habarlaıdy QazAqparat tilshisi.
Syr óńirinde birlesken 23 kásiporyn bar. Olarda 6281 qazaqstandyq, 925 sheteldik azamat eńbek etedi.
Qyzylorda oblysynyń Eńbek salasyndaǵy baqylaý basqarmasy sheteldik jumys kúshi artylǵan kásiporyndarda eńbek zańnamasynyń saqtalýyn tekserip shyqqan. Mamandar arnaıy sharttardy oryndaý, kásiporynda bir deńgeıdegi qyzmetti atqaratyn sheteldik jáne jergilikti mamandardyń jalaqysyndaǵy aıyrmashylyq, jumysshylarǵa jaǵdaı jasaý jáne ózge de máselelerdi nazarǵa aldy.
Nátıjesinde, tekserilgen 7 kásiporynnan 30 zańbuzýshylyq anyqtaldy. Olarǵa kemshilikterdi joıý jóninde nusqama berildi. Salynǵan aıyppuldar búginde tolyǵymen óndirildi.
«Atalmysh tekserý sharalary oblystyq prokýratýramen birge júrgizildi. Birlesken jospardan tys tekserý «PetroQazaqstan QumkólResorsız» AQ, «SNPS-Aı Dan Munaı» AQ, «Gejýba-Shıeli tsement kompanııasy» JShS, «Chaına Trıýmf Interneshnl Injınırıng» JShS, «IBK «Sıbý-Qyzylorda» JShS-terin qamtydy. Olardyń arasynda «Gejýba Shıeli Tsement Kompanııasy» JShS-da 7 zańbuzýshylyq deregi belgili boldy. Seriktestikte Eńbek kodeksiniń birqatar talaptary saqtalmaǵan. Jumys berýshiniń aktilerinde, eńbek shartynda kózdelgen jalaqy ýaqytyly jáne tolyq mólsherde tólenbegen. Sondaı-aq kelisimshart toqtatylǵan kezde eńbek demalysynyń paıdalanylmaǵan kúnderi úshin ótemaqy eseptelmegen. Oǵan qosa, jyl saıynǵy aqy tólenetin eńbek demalysynyń kestesi bekitilmegeni anyqtaldy», - dedi oblystyq Eńbek salasyndaǵy baqylaý basqarmasynyń basshysy Ertileý Jalǵasbaev.
Ústimizdegi jyldyń toǵyz aıynda osyndaı kásiporyndarda 2 jazataıym oqıǵa bolǵan. Sonyń saldarynan 3 adam aýyr jaraqat alǵan. Olar boıynsha arnaıy tergep-tekserý júrgizilip, qorytyndysy ishki ister organdaryna joldandy.
