Qyzylordada birqatar shekteý sharasy jeńildetildi
Aýrý kórsetkishteri boıynsha oblys «jasyl» aımaqta tur. Osyǵan baılanysty Qazaqstan Respýblıkasy Bas memlekettik sanıtarııalyq dárigeriniń 2021 jylǵy 4 aqpandaǵy №5 qaýlysyn basshylyqqa ala otyryp, oblysta birqatar shekteý sharasyn jeńildetetin jańa qaýly qabyldandy.
Onda dinı obektiler men bilim berý nysandaryndaǵy qoǵamdyq tamaqtaný oryndarynyń jumysyna qatysty ózgerister belgilengen.
Bul boıynsha syıymdylyǵy 150 adamǵa deıin, tolymdylyǵy 25 paıyzdan aspaıtyn meshitterde, aýyldyq jerlerde ǵana juma namazyna ruqsat berilip otyr. Al basqa meshitterde burynǵydaı juma namazynan basqa (bes namaz) ujymdyq qudaıǵa qulshylyq etýge bolady. Bul rette meshitterdiń tolymdylyǵy 30 paıyzǵa deıin bolýy tıis. Atap aıtqanda, 100 adamnan aspaýy qadaǵalanady.
Qaýlynyń taǵy erekshelegi - bilim berý uıymdarynda qoǵamdyq tamaqtaný obektileriniń qyzmetine ruqsat berilip otyr. Onda kúsheıtilgen sanıtarııalyq-dezınfektsııalyq jáne betperde rejımi saqtalady. Kelýshiler arasyndaǵy áleýmettik qashyqty saqtaý jáne ashanalardy tamaqtaný zalynyń otyratyn oryndarynyń jobalyq qýatynyń 30 paıyzynan aspaıtyn toltyrý sharty eskeriledi. Bul bilim berý uıymdaryndaǵy kontıngenti 300 oqýshyǵa deıin qalalyq jáne aýyldyq dástúrli formatta oqıtyn mektepter, 1-den 5-shi synypty qosa alǵanda, oqý bitiretin 9, 11 (12) synyptardaǵy oqýshylar, kolledjder men joǵary oqý oryndarynyń І kýrs stýdentterine arnalǵan.
«Oblysymyzdyń «jasyl» aımaqta bolýy eskerilip, karantın talaptary kezeń-kezeńimen jeńildetilgenimen halyqqa qyzmet kórsetý, qoǵamdyq oryndardaǵy, kásipkerlik nysandardaǵy karantın talaptarynyń saqtalýy monıtorıng toptardyń baqylaýynda bolady. Karantın talaptaryn buzýshylyqtar anyqtalǵan jaǵdaıda QR Ákimshilik quqyq buzýshylyq kodeksine sáıkes aıyppuldar salynady. Júıeli túrde buzýshylyqtar anyqtalǵan jaǵdaıda sot tártibimen qyzmeti toqtatylýy múmkin», - dedi Qyzylorda oblysynyń sanıtarııalyq-epıdemıologııalyq baqylaý departamentiniń basshysy Dınara Jańabergenova.
Sondaı-aq, budan buryn muǵalimder karantınge qaramastan Qazalyda mektepte jınalys ótkizgenin habarlaǵan edik.