Qyzylordada birqatar dámhanadan kemshilikter anyqtaldy
Qyzylorda oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń habarlaýynsha, bul oraıda Bas memlekettik sanıtar dárigerdiń 22 mamyrdaǵy qaýlysy negizge alynǵan. Onda uıymdastyrylǵan ujymdardaǵy, as bloktaryndaǵy jáne saýda obektilerindegi qoǵamdyq tamaqtaný oryndarynyń jumys algorıtmi bekitilgen. Bul oraıda Qyzylorda qalasynyń bas sanıtar dárigeriniń qaýlysy jarııalanǵan.
Qujatta karantın kezinde jumys jasaıtyn kásipkerlik nysandaryna qoıylatyn sanıtarlyq-dezınfektsııalyq, gıgıenalyq talaptar kórsetilgen. Sol talaptardyń saqtalýy udaıy baqylanyp otyr. Osy maqsatta jergilikti atqarýshy organdar tarapynan qurylǵan arnaıy mobıldi top karantın sharalaryn jeńildetý kezinde iske qosylǵan nysandarǵa kúndelikti reıd júrgizýde. Jumysshy top qoǵamdyq tamaqtaný oryndaryn aralaý barysynda saqtyq sharalaryna salǵyrt qaraǵan dámhanalardy anyqtady.
Mamandardyń aıtýynsha, birqatar ashanalarda ústelder men oryndyqtardyń arasyndaǵy araqashyqtyq saqtalmaǵan. Kelýshilerdiń qolyn óńdeýge arnalǵan antıseptık joq. Bar bolsa da olar kórinetin jáne qoljetimdi jerge ornatylmaǵan. Ashana jumyskerleri kelýshilerge bir ret qoldanylatyn qolǵappen, betperdemen qyzmet kórsetýi tıis. Degenmen oǵan beıjaı qaraıtyndar anyqtaldy.
«Ashanada tamaq ónimderi kesilmegen kókónister men jemisterdi qospaǵanda, ólshep-oralǵan kúıinde satylýy tıis. Kezekte 5 adamnan artyq turýyna jol berilmeıdi. Ústelder men oryndyqtar ár saǵat saıyn arnaıy dezınfektsııa quraldarymen óńdelýi tıis» dedi qalalyq taýarlar men kórsetiletin qyzmetterdiń sapasy men qaýipsizdigin baqylaý departamentiniń jetekshi mamany G. Mahanbetova.
Qazir Qyzylorda oblysynda koronavırýs ınfektsııasyn juqtyrǵan 470 adam bar. Onyń ishinde 304 naýqas syrqatynan jazylyp shyqty.