Qyzylordada birqatar basshylarǵa qaterli indetke qarsy ekpe salyndy
QYZYLORDA. QazAqparat - Qyzylorda oblysynda medıtsına salasynyń birqatar basshylary koronavırýske qarsy Reseıde óndirilgen «Spýtnık V» ekpesin saldyrdy, dep habarlaıdy QazAqparat tilshisi.
Oblystyń densaýlyq saqtaý basqarmasynyń basshysy Sábıt Pazılov óńirde qaterli indetke qarsy ekpe saldyrǵan alǵashqylardyń biri boldy. Ol ekpeni oblys ortalyǵyndaǵy №3 qalalyq emhanada saldyrdy.
Aldymen emhana dárigeri ol kisiniń densaýlyq jaǵdaıyn tekserdi. Epıdemıologııalyq anamnezi jınaqtalyp, vaktsına qabyldaýǵa eshqandaı qarsy kórsetilim joq ekeni anyqtaldy. Budan keıin basqarma basshysyna koronavırýske qarsy vaktsına egildi. Sodan soń ol 30 mınýt dáriger qadaǵalaýynda boldy.
«Oblys halqyna jalpy 80 myń doza vaktsına salynady dep kútilýde. Búginde aımaqqa 1000 danasy jetkizildi. Ekpe salý oblys ortalyǵyndaǵy №1, 3 jáne 6 qalalyq emhanalarda júrgizilýde. Bul jumysqa oblys boıynsha barlyǵy 133 meıirbıke tartylǵan», - dedi basqarma basshysy.
Sondaı-aq, búgin qaterli indetke qarsy ekpe saldyrǵan turǵyndar arasynda oblystyq sanıtarııalyq-epıdemıologııalyq baqylaý departamentiniń basshysy Dınara Janabergenova da boldy. Ol qaladaǵy №1 emhanada koronavırýs ınfektsııasyna qarsy Reseıde óndirilgen «Gam Kovıd Vak» ekpesin saldyrdy.
Aıta keterligi, oblysqa kelgen 1000 doza vaktsına «Salqyn tizbek» erejeleri saqtala otyryp jetkizildi. Ol ımmýnobıologııalyq preparattardy saqtaý qoımasynda saqtalýda. Bıylǵy jyldyń ekinshi toqsanynan bastap oblysta koronavırýs ınfektsııasyna qarsy otandyq vaktsına salynady dep josparlanýda.
Esterińizge sala ketelik, budan buryn Qyzylorda oblysy ákiminiń orynbasary koronavırýsqa qarsy vaktsına alǵanyn habarlanǵan edik.
