Qyzylordada bireýdiń malyn satyp jibergen alaıaq saýdager qolǵa tústi

QYZYLORDA. QazAqparat - Qyzylordada polıtseıler bireýdiń malyn satyp jibergen saýdagerdi qolǵa túsirdi, dep habarlaıdy QazAqparat tilshisi.

Qyzylorda qalalyq Polıtsııa basqarmasynyń Aqsaı polıtsııa bólimine oblys ortalyǵynyń 29 jastaǵy turǵyny shaǵym túsirdi. Onda bir azamat óziniń 21 bas sıyryn senimine kirip, ony satyp jibergeni jaıynda aıtylǵan.

«Alaıaq satylǵan maldyń aqshasyn ıesine qaıtarmaǵan. Sol kúni oǵan uqsas qylmys boıynsha taǵy 2 turǵyn aryzdandy. Alaıaq eki jábirlenýshiniń 30 bas jylqysyn satyp jiberip, aqshasyn ıemdengen. Bul baǵytta jedel-izdestirý sharalary júrgizildi. Krımınaldyq polıtsııa qyzmetkerleri kúdiktini qolǵa túsirdi. Ol 30 jastaǵy alypsatar saýdager bolyp shyqty. Ol qaltasyna basqan qarajatty óziniń qajetine jumsaǵan. Kúdikti atalǵan qylmystardy jasaǵanyn moıyndady. Atalǵan derek boıynsha QR Qylmystyq kodeksiniń 190-babynyń 3-bóligi boıynsha sotqa deıingi tergep-tekserý amaldary júrgizilýde», - dep málim etti Qyzylorda oblystyq polıtsııa departamentinen.

Vedomstvo málimetinshe, kúdiktige qatysty eshqaıda ketpeý jáne tıisti minez-qulyq týraly qolhat túrinde bultartpaý sharasy tańdalǵan. Qazirgi tańda alaıaqtyń basqa da isterge qatystylyǵy anyqtalýda. Jábirlenýshilerge keltirilgen shyǵyn mólsheri eseptelýde.

Eske salsaq, budan buryn Qyzylorda turǵynnyń kóliginen esirtki men qarý-jaraq tárkilendi.

https://kaz.inform.kz/news/kyzylorda-turgynnyn-koliginen-esirtki-men-karu-zharak-tarkilendi_a3857881