Qyzylordada «Bir túp alma aǵashy» pesasy anshlagpen ótti
QYZYLORDA. QazAqparat -Qyzylordadaǵy N. Bekejanov atyndaǵy qazaq mýzykalyq drama teatrynda Álimbek Orazbekovtyń «Bir túp alma aǵashy» dramasynyń premerasy ótti, dep habarlaıdy QazAqparat oblystyq mádenıet basqarmasyna silteme jasap.
Drama anshlagpen ótti. Qoıylymdy turyp tamashalaǵan kórermender de boldy. Spektakldi jas rejısser Aqtóre Orazaly qoıdy.
Bul spektakl - ómirdiń naq ózi! Ómirdiń alýan-alýan qıyndyqtaryna qaramastan, árbir sanaly adam qoǵamdaǵy, otbasyndaǵy óziniń rólin umytpaýy tıis degen ıgilikten týǵan dúnıe. Búgingi qoǵamdaǵy boıamasyz shyndyq - aǵaıyndar arasyndaǵy alaýyzdyq. Bir jatyrǵa syıǵandardyń bir shatyrǵa syıyspaýy - zor qasiret! Psıhologııalyq dramanyń máni árbir kórermenge týǵan el men týǵan jermen qatar, týǵan shańyraq pen ata-ananyń aldyndaǵy perzenttik paryzdyń bar ekenin pash etedi.
Otbasy taqyryby - máńgilik taqyryptardyń biri. Teatr sahnasynda jastarǵa úlgi bolarlyq, máni bar shyǵarmalardy qoıý qajettilikten týyndap otyr. Osyndaı mańyzy zor dúnıelerden jastar sabaq alýy qajet. Ata-anasyn umytpasyn, baýyrmal bolsyn, otbasy meıiriminen ajyramasyn degen maqsatta «Bir túp alma aǵashy» dramasy kórermenge usynyldy.
Qoıylymnyń sheshýshi sátterinde kórermender kózderine jas aldy. Shynaıy beıneni sahnalaǵan óner maıtalmandaryn zor yqylasqa bólep, qol-qoshemetpen alǵystaryn bildirdi.
