Qyzylordada bir otbasynda bes adam gazǵa ýlanyp qaldy
QYZYLORDA. QazAqparat - Qyzylorda qalasynda bir otbasynda bes adam kómirqyshqyl gazyna ýlanyp qaldy, dep habarlaıdy QazAqparat tilshisi.
Oqıǵa 19 aqpanda saǵat 05.23-te oblys ortalyǵyndaǵy Qarjaýbaev kóshesindegi jeke turǵyn úıde boldy. Turǵyn úıdegi gazben sýdy jylytý qondyrǵysynan aqaý shyǵyp, úıdiń ishine gaz taraǵan.
«Oqys oqıǵadan bes adam kómirqyshqyl gazyna ýlanyp qaldy. Olardyń tórteýine alǵashqy medıtsınalyq kómek kórsetilip, úılerine qaıtaryldy. Al 1996 jyly dúnıege kelgen qyz aýrýhanada em qabyldaǵan», - dep málim etti Qyzylorda oblystyq tótenshe jaǵdaılar departamenti bastyǵynyń mindetin atqarýshy Rýslan Qaıraqbaev.
Onyń aıtýynsha, oblysta órt oqıǵasynyń jıi shyǵýy da alańdatady. Jyl basynan beri oblysta osyndaı 66 derek tirkelgen. Ol byltyrǵy jylmen salystyrǵanda 34 paıyzǵa kóp. Osy oqıǵalar saldarynan bes adam kóz jumyp, 9 adam jaraqat alǵan.
Esterińizge sala ketelik, budan buryn Shıelide bir otbasynyń 3 adamy tútinge ýlanyp qaldy.
