Qyzylordada bir kúnniń ishinde 705 quqyqbuzýshylyq anyqtaldy
QYZYLORDA. QazAqparat - Aǵymdaǵy jyldyń tamyz aıynyń 23-25 kúnderi oblys kóleminde «Quqyq tártibi» jedel-profılaktıkalyq is-sharasy júrgizilip, jumys barysy kúsheıtilgen júıege kóshirildi.
Atalǵan is-sharaǵa ІІO-nyń jeke quramy jumyldyrylyp, is-sharanyń birinshi kúninde barlyǵy 705 ákimshilik quqyqbuzýshylyq anyqtaldy. Bul týraly QazAqparat tilshisi oblystyq ІІD silteme jasap habarlady.
Onyń ishinde jol-kólik oqıǵasyna tikeleı septigin tıgizetin óreskel jol qozǵalys erejesin buzý faktileriniń biri - avtokólikti mas kúıinde basqarǵan 11 júrgizýshi anyqtalsa, qaýipsizdik beldigin taqpaǵan 114 júrgizýshige, uıaly telefonmen sóılesken 73 júrgizýshige, jyldamdyqty shamadan tys asyrǵan 58 júrgizýshige ákimshilik hattama toltyryldy.
Sonymen qatar, «Múldem tózbeýshilik» qaǵıdaty aıasynda spırttik ishimdik ishý nemese qoǵamdyq oryndarǵa mas kúıinde kelý deregi boıynsha 76, usaq buzaqylyq deregi boıynsha 53 quqyqbuzýshylyq anyqtalyp, tıisti sharalar kórildi.
Ýaqytsha beıimdeý jáne ıntoksıkatsııa ortalyǵyna 42 azamat jetkizildi.
Qazaqstan Respýblıkasynda bolý erejesin buzǵany úshin TMD elderiniń 60 azamatyna shara qoldanyldy.
Táýlik ishinde 5 qylmystyń beti ashylyp, zańsyz aınalymnan 1 kg. 241 gr. esirtki zaty alyndy.
Aıta keter jaıt, Aıdarly aýylynan ońtústikke qaraı 15 shaqyrym jerdegi jyńǵyl arasynan esirtki alqaby anyqtaldy. Egistikten jalpy salmaǵy 30 kelini quraıtyn 600 túp sora ósimdigi aıǵaq zat retinde alynyp, saraptama qorytyndysymen «sora ósimdigi» ekendigi bekitildi. Oqıǵa ornynan atalǵan ósimdikterdi kútip-baptap jatqan jerinen 1979 jyly týylǵan qala turǵyny ustalyp, ýaqytsha ustaý oqshaýlaǵyshyna qamaldy. Atalǵan derek boıynsha QR Qylmystyq kodeksiniń 300-baby 2-bóligimen qylmystyq is qozǵaldy.
