Qyzylordada bir kúnde eki adam sýǵa ketti
QYZYLORDA. QazAqparat - Qyzylorda oblysynda bir kúnde eki adam sýǵa ketti, dep habarlaıdy QazAqparat tilshisi.
Oqıǵanyń biri Qyzylorda qalasyndaǵy «Astana» móltek aýdany tusynda oryn tepken Qyzylorda kanalynda boldy. Onda qalaǵa qarasty Tasbóget kentinde turǵan 22 jastaǵy azamat sýǵa ketti. Qutqarýshylar marqumnyń máıitin bir saǵatan keıin taýyp aldy.
Dál osyndaı jaǵdaı Qarmaqshy aýdany Dúr Ońǵar aýyly mańynda oryn aldy. Aýyl mańyndaǵy kólge 10 jastaǵy jasóspirim batyp ketken. Aýyl turǵyndary máıitti ózderi sýdan shaǵaryp alǵan.
«Oblys boıynsha zańdy túrde jumys jasaıtyn 3 jaǵajaı tirkelgen. Bir jaǵajaı Shıeli kentinde bolsa, qalǵan ekeýi Qyzylorda qalasynyń aýmaǵyndaǵy Araı móltek aýdany men Belkól kentiniń mańynda ornalasqan. Osyǵan oraı qaýipsizdik sharalaryn saqtaý maqsatynda turǵyndar arasynda nasıhat jumysy bastaldy. Bul baǵytta reıd bastaldy», - deıdi Qyzylorda oblystyq Tótenshe jaǵdaılar departamenti Memlekettik til jáne aqparat tobynyń bas mamany Aıgúl Nurmanova.
Buǵan deıin jyl basynan beri Syr óńirinde 1 adam sýǵa ketken edi. Bul derek Jańaqorǵan aýdanynda tirkeldi. Tótenshe jaǵdaılar salasy mamandarynyń aıtýynsha, túsindirme jumystaryn júrgizý nátıjesinde qaıǵyly oqıǵalar azaıyp keledi. Atap aıtar bolsaq 2015 jyly - 43, 2016 jyly - 35, 2017 jyly - 26 adam sýdan qaza boldy.
Ádiljan Úmbet
Foto: imenno.ru
