Qyzylordada bir kúnde balyq aýlaý qaǵıdasyn buzǵan 10 adamdy qolǵa túsirdi
QYZYLORDA. QazAqparat - Qyzylorda oblystyq orman sharýashylyǵy, janýarlar dúnıesi ınspektsııasynyń mamandary bir táýliktiń ishinde balyq aýlaý qaǵıdasyn buzǵan 10 adamdy qolǵa túsirdi. Olardan 100 keliden astam balyq tárkilenip alyndy, dep habarlaıdy QazAqparat tilshisi.
Atalmysh ınspektsııanyń Aral aýdanyndaǵy mamandary bul baǵytta naqty isterdi júrgizip keledi. Balyq aýlaý qaǵıdalarynyń oryndalý barysyn qadaǵalaıdy. Ótken jyly osyndaı talaptardy oryndamaǵan 384 derek tirkelgen. Ústimizdegi jyldyń 5 aıynda ol 178 derekti qurap otyr.
«Tyıym salynǵan ýaqytta ruqsat etilmegen aýmaqtan balyq aýlaǵandar jazaǵa tartylady. Olarǵa 20 aılyq eseptik kórsetkish mólsherinde aıyppul salynady. Bizdiń tehnıkamyzdy jańartýǵa kóńil bólse deımiz. teńizge laıyqty qaıyqtar bolǵany durys», - dedi oblystyq orman sharýashylyǵy, janýarlar dúnıesi ınspektsııasynyń bólim basshysy Esenbaı Esirkepov.
Mamandardyń aıtýynsha, sáýir men maýsym aıynyń 10-na deıingi aralyq balyqtyń ýyldyryq shashatyn mezgili bolǵandyqtan bul kezeńde olar erekshe qorǵaýǵa alynady. Degenmen, osy ýaqyt aralyǵynda mamandar 42 zańsyz derekti tirkedi.
