Qyzylordada bir aptada úsh bala sýǵa ketti
Alǵashqy oqıǵa Jańaqorǵan aýdanynda boldy. Aýdan ortalyǵyna jaqyn Taıpaqkól kanalynda on jastaǵy bala sýǵa batyp ketken. Onyń jansyz denesin turǵyndar sýdan shyǵaryp aldy.
Taǵy bir oqıǵa Qyzylorda qalasy Ǵanı Muratbaev kóshesi boıyndaǵy Syrdarııa ózeni ústindegi kópir mańynda tirkeldi. Bul orynda 2006 jyly dúnıege kelgen bala qaıtys boldy. Onyń denesin qutqarýshylar sýdan alyp shyqty.
Endi biri Aral aýdany Raıym aýyldyq okrýginde boldy. Sýǵa túsken 2004 jylǵy jasóspirim qaıtadan jaǵaǵa jete alǵan joq. Jansyz denesi turǵyndar kúshimen shyǵaryldy.
«Aıta keterligi, turǵyndar balalardyń qaýipsizdigine salǵyrt qaraıdy. Olardyń qaıda júrgeninen habarsyz. Jyl basynan beri 21 adam sýǵa ketti. Onyń ishinde segiz bala osyndaı tótenshe jaǵdaıdan qaıtys boldy. Biz turǵyndar arasynda qaýipsizdik sharalary jóninde úgit-nasıhat sharalaryn júrgizemiz. Degenmen oǵan kóbisi qulaq asa bermeıdi. Saldarynan tosyn jaǵdaılar oryn alyp jatady», - dedi Qyzylorda oblysy tótenshe jaǵdaılar departamenti bastyǵynyń orynbasary Saıd Moldaqaraev.
Aıta keteıik, budan buryn Qyzylorda oblysynda 42 jastaǵy adam sýǵa batyp ketkenin habarlaǵan edik.