Qyzylordada bilim mekemesi basshylary jemqor qyzmetkeri úshin jaýapkershilikke tartylady
QYZYLORDA. QazAqparat - Qyzylordada bilim mekemeleriniń basshylary qaramaǵyndaǵy qyzmetkerlerdiń quqyq buzýshylyqtary úshin jaýapqa tartylatyn boldy, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń habarlaýynsha, jergilikti bilim berý uıymdarynyń basshylary qaramaǵyndaǵy qyzmetkerleriniń quqyq buzýshylyqtary úshin jekeleı jaýapkershilikke tartylýy jóninde kelisimge qol qoıdy. Byltyr jeltoqsan aıynda Syr óńirinde «Aqmeshit - adaldyq alańy» jobalyq keńsesi ashyldy.
Mundaı sharanyń bilim berý salasynan bastalýy beker emes. 2017 jyly aımaqta bilim salasynda 15 sybaılas jemqorlyq sıpatyndaǵy qylmys oryn aldy. Sonyń saldarynan salalar arasynda osyndaı olqylyqqa jol bergen alǵashqy úshtikke endi. Byltyr profılaktıkalyq sharalardyń nátıjesinde ol 40 paıyzǵa tómendedi. Atap aıtqanda, bul salada 9 qylmys oryn alǵan.
Degenmen, sońǵy jyldarda ustazdar qaýymy sybaılas jemqorlyqqa beıim salalardyń alǵashqy bestiginen túspeı otyr. Osyǵan oraı, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti «Aqmeshit - adaldyq alańy» jobalyq keńsesimen birlese otyryp bilim salasynyń qyzmetkerlerimen kezdesý ótkizdi. Oblystyq bilim basqarmasyna qarasty barlyq kolledjder men mektepterdiń basshylary qatysqan kezdesýde bilim salasyndaǵy sybaılas jemqorlyq táýekelderi jan-jaqty talqylandy.
Kezdesý barysynda bilim berý uıymdarynyń basshylary qaramaǵyndaǵy qyzmetkerleriniń quqyq buzýshylyqtary úshin jekeleı jaýapkershilikke tartylýy jóninde kelisimge qol qoıdy.
«Kelisim negizinde dırektorlar bilim mekemelerine bólingen bıýdjet qarajatynyń ashyqtyǵyn qamtamasyz etýdi jáne qyzmet babyn paıdalanyp qyzmetkerlerden, ata-analardan, stýdentterden syı-syıapattar almaýdy, aqsha jınaý faktilerin boldyrmaýdy jekeleı jaýapkershilikterine alady. Sonymen qatar, kolledjderde sessııalardyń taza ótýi qatań baqylaýda bolady», - dedi Qyzylorda oblystyq memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary Berikbol Baıqojaev.
Budan buryn Qyzylordada para bermeıtinder sany artqanyn habarlaǵan edik.
