Qyzylordada bilim granttaryn arnaıy top baqylaýda ustaıdy

QYZYLORDA. QazAqparat - Qyzylorda oblysy boıynsha bıylǵy oqý jylyna memlekettik tapsyrys aıasynda kolledjderge bólingen 3 myńnan astam bilim grantyna monıtorıng músheleri baqylaý jasaıtyn boldy, dep habarlaıdy QazAqparat tilshisi.

Baqylaý nátıjesinde bilim granttarynyń zańdy ári ádiletti túrde jastarǵa berilýi qadaǵalanady. Bul týraly sybaılas jemqorlyq táýekelderine taldaý júrgizetin arnaıy monıtorıngtik toptyń kezekti otyrysynda aıtyldy. Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń basqarma basshysy Baǵdat Іzkenovtyń aıtýynsha, arnaıy monıtorıngtik top ókilderi memlekettiń tapsyrysyn alatyn memlekettik jáne jekemenshik kolledjderde oqýǵa qabyldaý úderisin tolyq qadaǵalaıdy.

«Top músheleri bilim granttaryn zańsyz ıelený, oqýǵa zańsyz qabyldaý jáne emtıhan qabyldaýda artyqshylyqtar kórsetý túrindegi jaǵdaılardy anyqtaý úshin qoǵamdyq baqylaý júrgizedi» - dedi ol.

Búgingi tańda oblys boıynsha 29 memlekettik jáne jekemenshik kolledjderdiń emtıhan qabyldaý komıssııalarynyń quramyna oblystyq, qalalyq jáne aýdandyq monıtorıngtik top ókilderi arnaıy buıryqpen engizildi. Olar óz jumysyn bastap ketti.