Qyzylordada bilim berý mekemeleri aldynda 139 jol belgisi jetispeıtindigi anyqtaldy
QYZYLORDA. QazAqparat - Jańa oqý jylynyń bastalýyna baılanysty Qyzylorda qalasy kólemindegi barlyq bilim berý uıymdarynyń aınalasynda jol qozǵalysy qaýipsizdigin qamtamasyz etý maqsatynda jol qozǵalysyn retteıtin tehnıkalyq qurylǵylarǵa zerdeleý jumystary júrgizilip, oblys ortalyǵynyń birshama bilim berý uıymdarynyń aldyna jol qozǵalysy qaýipsizdigin qamtamasyz etetin jol belgileri men jol ústi tańbalary jetispeıtindikteri anyqtaldy. Bul týraly QazAqparat oblystyq ІІD-ge silteme jasap habarlady.
Zerdeleý nátıjesinde qala aýmaǵynda ornalasqan 58 mektep pen mektepke deıingi mekemeler aldynda 139 dana jol belgileri jetispeıtindigi, 101 jerdegi jaıaý júrginshiler ótpesi tańbalaryna jańartý jumystaryn júrgizý kerektigi jáne 10 mekteptiń janyndaǵy jol belgileri tal butalarynan kórinbeı qalǵandyǵy anyqtaldy.
Osy rette bilim berý uıymdarynyń aınalasynda anyqtalǵan kemshilikter jóninde qalalyq ákimdikke habarlama-usynys joldanyp, qalalyq kommýnaldyq sharýashylyǵy, jolaýshylar kóligi jáne avtomobıl joldary bólimine kemshilikterdi joıý jóninde nusqama berildi.
Nusqama talabyn jaýapty mekemeler oryndamaǵan jaǵdaıda Qazaqstan Respýblıkasynyń Ákimshilik quqyq býzýshylyq týraly Kodeksiniń 631-baby boıynsha olarǵa ákimshilik jaýapkershilik kózdelgen.
Dál osyndaı jumystar barlyq aýdandyq Іshki ister bólimderinde júrgizilýde.
