Qyzylordada beınebaqylaý kamerasynyń kómegimen 92 qylmystyń beti ashyldy
QYZYLORDA. QazAqparat - Qyzylorda oblysynyń Polıtsııa departamentine azamattardan 34 myńǵa jýyq qońyraý kelip tústi, dep habarlaıdy QazAqparat tilshisi.
Bıylǵy jyldyń 10 aıynda departamenttiń Jedel basqarý ortalyǵynyń 102 arnasyna 34 myńǵa jýyq qońyraý túsken. Onyń ishinde polıtsııa quzyryna jatatyn 32 myńnan astam habarlamaǵa qyzmet kórsetildi.
«Beınebaqylaý kamerasynyń kómegimen 92 qylmystyń beti ashyldy. Beınebaqylaýshy mamandar azamattardan kelip túsken habarlamalardy qabyldaý jáne óńdeý barysynda barlyq kúdikti áreketterdi, adamdardyń minez-qulqyn jáne beınebaqylaý kamerasyna túsken kúmándi tulǵalardy jedel tekseredi», - dep málim etti Qyzylorda oblystyq polıtsııa departamentinen.
Jyl basynan beri beınebaqylaý kameralarynyń kómegimen barlyǵy 14 myń ákimshilik quqyq buzýshylyq anyqtaldy. Nátıjesinde 12 myń jol qozǵalysy erejelerin buzý anyqtaldy.
Sondaı-aq, Qyzylordada qańǵybastyqqa salynǵan adamdarǵa kómek kórsetildi.
