Qyzylordada besinshi qabattan sekirip ketken 14 jastaǵy qyz qaıtys boldy
QYZYLORDA. QazAqparat - Qyzylorda qalasynda kóp qabatty úıdiń besinshi qabatynan sekirip ketken 14 jastaǵy qyz kóz jumdy, dep habarlaıdy QazAqparat tilshisi.
Qyzylorda oblystyq Tótenshe jaǵdaılar departamenti órt sóndirý jáne avarııalyq-qutqarý jumystary qyzmetiniń habarlaýynsha, 7 naýryzda saǵat 11:00 shamasynda oblystyq jumyldyrý daıyndyǵy basqarmasynan habarlama kelip túsken. Onda oblys ortalyǵynyń Syrdarııa ózeni sol jaǵalaýyndaǵy bóliginde ornalasqan kóp qabatty úıdiń besinshi qabatynan 2007 jylǵy jasóspirim qyzdyń sekirip ketkeni aıtylǵan.
Bul oqıǵany Qyzylorda qalalyq polıtsııa basqarmasy rastady. Oqıǵa barysy jóninde túsinikteme berdi.
«Jas qyz óz-ózine qol jumsaýǵa árekettengen. Kámeletke tolmaǵan jetkinshek medıtsınalyq mekemeniń jansaqtaý bóliminde qaıtys boldy. Atalǵan derek boıynsha QR Qylmystyq kodeksiniń 105-babynyń 3-bóligimen (Ózin-ózi óltirýge deıin jetkizý) sotqa deıingi tergep-tekserý amaldary bastaldy. Tıisti saraptamalar taǵaıyndaldy. Oqıǵanyń mán-jaıy anyqtalýda», - dep málim etti Qyzylorda qalalyq polıtsııa basqarmasynan.
Aıta keteıik, budan buryn Qyzylordada jalǵan aqshamen jergilikti turǵyndardy aldaǵan jigit sottaldy.
