Qyzylordada bes qabatty turǵyn úı órtenip, 73 adam evakýatsııalandy
Órt keshe túngi ýaqytta Qyzylorda qalasy Álıhan Bókeıhanov kóshesi 74 úıdegi turǵyn úıde bolǵan. Oqıǵa ornyna qala ákimi Nurlybek Nálibaev, qala prokýrory, oblystyq tótenshe jaǵdaılar departamenti jáne oblystyq polıtsııa departamentiniń basshylary kelip, keleńsiz jaǵdaıdyń mán-jaıymen tanysty.
Qala ákimdiginiń habarlaýynsha, órt oqıǵasy oryn alǵan besinshi qabattaǵy turǵyndar qaýipsiz oryndarǵa ýaqytsha ornalastyryldy. Órt saldarynan kómirqyshqyl gazyna ýlaný jaǵdaıymen 6 turǵyn oblystyq medıtsına ortalyǵyna jetkizildi. Olardyń jaǵdaıy dárigerlerdiń jiti baqylaýyna alyndy. Oblystyq polıtsııa departamenti baspasóz qyzmetiniń habarlaýynsha, oblystyq polıtsııa jáne tótenshe jaǵdaılar departamentiniń qyzmetkerleri órt ishinen 28 adamdy syrtqa aman alyp shyqty.
«Onyń ishinde kámelettik jasqa tolmaǵan 7 bala bar. Polıtseıler qutqarýshylarmen birge jalpy atalmysh turǵyn úıden 73 adamdy evakýatsııalady. Órt shyqqan úıden jalpy 15 gaz ballony alyndy. Tilsiz jaýdy aýyzdyqtaýǵa 40-qa jýyq polıtsııa qyzmetkeri, 10 qyzmettik avtokólik jáne tótenshe jaǵdaı salasynyń mamandary, jedel járdem dárigerleri jumyldyryldy», - dep málim etti Qyzylorda oblystyq polıtsııa departamentiniń baspasóz qyzmeti.
