Qyzylordada bes aıda bolǵan 155 jol-kólik oqıǵasynan 47 adam kóz jumdy

QYZYLORDA. QazAqparat - Qyzylorda oblysynda bıylǵy jyldyń 5 aıynda oblysta 155 jol-kólik oqıǵasynan 47 adam kóz jumyp, 196 adam dene jaraqatyn aldy, dep habarlaıdy QazAqparat tilshisi.

Bul ótken jylǵy jol-kólik oqıǵalarynan 12% (138-den 155-ke) kóp. Sonyń saldarynan qaıtys bolǵandar 68% (28-den 47-ge), jaraqat alǵandar 12% (175-ten 196-ǵa) ósken.

«Jol-kólik oqıǵasynyń basty sebebi júrgizýshiler men jaıaý júrginshiler tarapynan jol erejesiniń saqtalmaýy. Mundaı oqıǵalar negizinen jyldamdyqty shamadan tys asyrýdan, joldyń qarsy baǵytyna shyǵýdan, jaıaý júrginshiler ótkelinde olarǵa basymdyq bermeý jáne manevr erejesin buzý saldarynan bolady.

Jyl basynan beri qalada ornatylǵan avtomattandyrylǵan júıeler arqyly jyldamdyqty asyrýdyń 9 890 deregi anyqtaldy. Oblys ortalyǵynda júrgizýshiler tarapynan jyldamdyqty shamadan tys asyrý deregi azaımaı otyr.

Osy sebepti qala ortalyǵynda bolǵan 69 jol-kólik oqıǵasynan 8 adam kóz jumyp, 73-i dene jaraqatyn aldy», - dedi oblystyq polıtsııa departamenti bastyǵynyń birinshi orynbasary Shamshıdın Ámıtov.

Eske salsaq, Qyzylordada alaıaqtyq qylmysynyń basym bóligi ınternet arqyly jasalǵan.