Qyzylordada belgili dırıjerge eskertkish ornatylady
QYZYLORDA. QazAqparat - Qyzylorda oblysynda QR halyq ártisi, memlekettik syılyqtyń laýreaty, elimizdiń eńbek sińirgen qaıratkeri, dırıjer Tólepbergen Ábdirashevke eskertkish ornatylady, dep habarlaıdy QazAqparat tilshisi.
Bul jaǵymdy jańalyqty Qyzylorda oblysynyń ákimi Qyrymbek Kósherbaev Jańaqorǵan aýdanynda ótken respýblıkalyq ǵylymı-tájirıbelik konferentsııa barysynda málim etti.
«Syr eliniń abyroıyn asqaqtatqan talanttardyń biri - jerlesimiz Tólepbergen Ábdirashev. Qazaqstan Respýblıkasynyń Halyq qaharmany Nurǵısa Tilendıev aıtqandaı, «Tólepbergen qazirdiń ózinde álemdik ónerdiń injý-marjan tulǵasy». Ózderińiz biletindeı, Qazaqstan Respýblıkasy Úkimetiniń qaýlysymen ózi oqyǵan №239 orta mektepke Tólepbergen Ábdirashevtiń esimi berilip, qoǵamdyq negizdegi mýzeı ashyldy. Bolashaqta mekteptiń aldynda Ábdirashevtiń eskertkishi qoıylady. Odan bólek, Syrdarııanyń sol jaǵalaýynda salynyp jatqan jańa qaladaǵy kóshelerdiń birine T.Ábdirashevtiń esimi beriledi», - dedi oblys ákimi.
Tólepbergen Ábdirashev 1948 jyly 26 shildede Jańaqorǵan aýdanynyń Keńes eldi mekeninde dúnıege kelgen. Máskeý konservatorııasynda bilim aldy, Gennadıı Rojdestvenskııdiń shákirti. 25 jylǵa jýyq ýaqyt ishinde Qazaqstan Respýblıkasynyń Memlekettik sımfonııalyq orkestri men Qurmanǵazy atyndaǵy Ulttyq konservatorııanyń dırıjer synybyn basqardy. Shákirtteri - Alan Bóribaev, Abzal Muhıtdınov, Erbolat Ahmedııarov. Qoǵam qaıratkeri 2007 jyldyń 26 qazany kúni dúnıeden ótti.
Ádiljan Úmbet
